زیادبوونی باج و گومرگ نرخی كاڵاكانی گران كردوه‌

east-fruit

سەوزە و میوە

زیادبوونی باج و گومرگ له‌ عیراق كاریگه‌ری له‌سه‌ر نرخی كاڵاكان دروستكردوه ‌و سه‌رۆكی لیژنه‌ی سه‌ندیكای عه‌لوه‌ی سلێمانیش سه‌باره‌ت به‌ سه‌وزه‌ و میوه‌ی هاورده‌ ده‌ڵێت: به‌هۆی به‌رزبوونه‌وه‌ی باج و گومرگ نرخه‌كان زیادیان كردووه‌.

حاجی سه‌روه‌ر عه‌لی سه‌رۆكی لیژنه‌ی سه‌ندیكای عه‌لوه‌ی سلێمانی، به‌ وێبسایتی ره‌سمی یه‌كێتیی نیشتمانیی كوردستان PUKMEDIA  راگه‌یاند: به‌رهه‌می ناوخۆ به‌ش ناكات و زیادبوونی باج و گومرگیش بارگرانی بۆ هاووڵاتییان دروستكردوه‌، چونكه‌ به‌هۆی زیادبوونی رێژه‌ی باج و گومرگ له‌سه‌ر به‌رهه‌مه‌ هاورده‌كراوه‌كان، نرخی میوه ‌و سه‌وزه‌ له‌ بازاڕ‌ه‌كانی هه‌رێمی كوردستان روو له ‌به‌رزبوونه‌وه‌ ده‌كات.

روونیشی كرده‌وه‌: له‌گه‌ڵ به‌رزبوونه‌وه‌ی باج و گومرگ له‌سه‌ر كاڵاكان، هاوكات به‌پێی بڕ‌یاره‌ نوێیه‌كه‌ى گومرگ، هه‌ر كیلۆیه‌ك میوه‌ به‌ (100) دینار و سه‌وزه‌ به‌ (50) دیناری عیراقی دیاری ده‌كات، ئه‌مه‌ش له‌كاتێكدایه‌ كه‌ ساڵی رابردوو گومرگی بارهه‌ڵگرێكی گه‌وره‌ ‌(350) هه‌زاربوو، به‌ڵام له‌ئێستادا بۆ (700) هه‌زار دینار به‌رزبوه‌ته‌وه ‌و ئه‌مه‌ش كاریگه‌ری له‌سه‌ر نرخه‌كان دروستكردووه‌.

باسی له‌وه‌شكرد: پێده‌چێت ئێرانیش باج و گومرگ زیاد بكات، ئه‌مه‌ش جارێكی دیكه‌ كاریگه‌ری له‌سه‌ر زیادبونی نرخه‌كان دروستده‌كات و هه‌موو كاڵایه‌ك چه‌ند هێنده‌ی خۆی به‌رزده‌بێته‌وه‌.

حاجی سه‌روه‌ر عه‌لی سه‌رۆكی لیژنه‌ی سه‌ندیكای عه‌لوه‌ی سلێمانی ئه‌وه‌شی خسته‌ڕ‌وو: به‌رهه‌می ناوخۆیی ته‌نها له‌ جۆری "گه‌ڵاداره‌كان" به‌هێنده‌ی پێویستی ناوخۆ هه‌یه‌ و به‌رهه‌مه‌كانی دیكه‌ پێداویستی بازاڕ‌ی پێ پڕ‌ناكرێته‌وه‌، بۆیه‌ له‌كۆتاییدا هاووڵاتییان ناچارن باجی ئه‌م گرانبوونه‌ بده‌ن.

PUKMEDIA