بەڕێوەبەرێکى چاپ و بڵاوکردنەوە: دەرکەوتنى رووخسارى هەژاران لە بەرنامەکاندا قەدەغەیە

PUKMEDIA

شیروان عەوڵا بەڕێوەبەرى چاپ و بڵاوکردنەوە

زۆرێک لە دەزگاکانى راگەیاندن بەهۆى مانگى پیرۆزى رەمەزانەوە بەرنامەى خێرخوازى پەخش دەکەن، بەڵام رووخسارى ئەو کەسانەى هاوکارى دەکرێن دەردەکەوێت، کە ئەمەش دواتر گرفتیان بۆ دروست دەکات لەناو کۆمەڵگا و بەتایبەتیش منداڵان، بەڕێوەبەرێکى چاپ و بڵاوکردنەوەش رایدەگەیەنێت: پێویستە رووخسارى ئەو کەسانەى کە لە بەرنامەکاندا هاوکارى دەکرێن، بە پێى فەرمانى وەزارى و کارگێڕى وەزارەتى رۆشنبیرى بشاردرێنەوە و تەڵخ بکرێن.

شیروان عەوڵا بەڕێوەبەرى چاپ و بڵاوکردنەوە، رایگەیاند: ئەو کەناڵانەى بەرنامەى خێرخوازییان هەیە، پێویستە رووخسارى ئەو کەسانەى کە لە بەرنامەکانیاندا خێرخوازان یان کەناڵەکە هاوکارى دەکات، بە پێى فەرمانى وەزارى و کارگێڕى وەزارەتى رۆشنبیرى بشاردرێنەوە و تەڵخ بکرێن و بەتایبەتیش منداڵان.

روونیکردەوە: ئەو کەسەش کە خێرى پێ دەکرێت پێویستە راستەوخۆ خێرەکە و هاوکارییەکەى پێ بدرێت، دەکرێت ئەو ئەپ و هەژمارە بانکیانەى کە ئێستا بە ئاسانى هەن و دروست دەکرێن، خاوەن ماڵەکە هەیبێت و لەسەر شاشەى کەناڵەکە هەبێت و لە کەناڵەکەوە دەربکەوت، بۆ ئەوەى خێرخوازان راستەوخۆ هاوکارى خۆیانى بۆ بنێرن، نەک لە رێى کەناڵەکە و لیژنەیەک لە کەناڵەکە هاوکاریەکە بگات بە خەڵکەکە.

PUKMEDIA