گۆتێرێس: مافەكانی مرۆڤ لەژێر هەڕەشەدان

UN

شەست و یەكهەمین كۆبوونەوەی ئاسایی ئەنجوومەنی مافی مرۆڤی نەتەوە یەكگرتووەكان لە جنێڤ

ئەنتۆنیۆ گۆتێرێس، سكرتێری گشتی نەتەوە یەكگرتووەكان، هۆشداریی دەدات لەوەی كەمافەكانی مرۆڤ لەسەرانسەری جیهاندا لەژێر هێرش و هەڕەشەدان.

ئەمڕۆ دووشەممە 23ی 2ی 2026، ئەنجوومەنی مافی مرۆڤی نەتەوە یەكگرتووەكان شەست و یەكهەمین كۆبوونەوەی ئاسایی خۆی لە جنێڤ ئەنجامداو تاوتوێی لێدوانەكانی سەرۆكی ئەنجومەنی گشتی، سكرتێری گشتی نەتەوە یەكگرتووەكان، كۆمسیاری باڵای مافەكانی مرۆڤی نەتەوە یەكگرتووەكان و وەزیری دەرەوەی سویسرای كرد.

لەدانیشتنەكەدا، ئەنتۆنیۆ گۆتێرێس، سكرتێری گشتی نەتەوە یەكگرتووەكان، وتارێكی پێشكەشكردو رایگەیاند: مافەكانی مرۆڤ لەسەرانسەری جیهاندا لەژێر هێرش و هەڕەشەدان، لەكاتێكدا كەمافەكانی مرۆڤ پاشەكشەی كرد، هەموو بوارەكانی دیكەی ژیان پاشەكشە دەكەن.

ئاماژەی بەوەشكرد: لەسەرانسەری جیهاندا مافەكانی مرۆڤ بەمەبەست و هەندێك جار بەستراتیژ پاشەكشەیان پێدەكرێت، راشیگەیاند: بەبیری هەمووانی دەهێنمەوە كە لەدەستبەكاربوونم وەك سكرتێری گشتی نەتەوە یەكگرتووەكان، جەختم لەپابەندبوونی قووڵی كەسیی خۆم بە مافەكانی مرۆڤ كردەوە.

وتیشی: پاشەكشەكردن بە مافەكانی مرۆڤ، كۆمەڵگە بەرەو داڕمان دەبات، بەپێچەوانەشەوە بەرەوپێشبردنی مافەكانی مرۆڤ كۆمەڵگەی مرۆڤایەتی بەرەو باشتر بردووە.

لەكۆتایی وتارەكەشیدا گۆتێرێس رایگەیاند: بانگەواز لەكۆمەڵگەی نێودەوڵەتی دەكەم كە نەهێڵن چیدیكە پاشەكشەی مافەكانی مرۆڤ ببێتە قوربانی بەرژەوەندی سیاسی و كێبڕكێی جیۆسیاسی.

PUKMEDIA