پرۆژەی رووناکی ماڵەکانی تاریک کرد

AFP و لۆگۆی پرۆژەی رووناکی

دۆخی هاوولاتیان لەکاتی نەبوونی کارەبا

لەماوەی 24 سەعاتی رابردوودا بەشێکی زۆر لە گەڕەکەکانی ( سلێمانی و هەولێر و دهۆک و هەڵەبجە) لە پرۆژەی رووناکییەوە تەنها 4 سەعات کارەبایان پێدراوە، سەرچاوەیەکیش لە کۆنترۆڵی کارەبای هەرێم دەڵێت: "ئەو بڕە کارەبایەی لەبەردەستدا هەیە بۆ دابەشکردن زۆر زۆر کەمە"، بەمەش پرۆژەی رووناکیی، تاریکی بۆ هاووڵاتیان هێناوە و خاوەن موەلیدە ئەهلییەکانیش ئامادە نین کار بە موەلیدەکانیان بکەن.

سەرچاوەیەک لە کۆنترۆڵی کارەبای هەرێم بۆ PUKMEDIA وتی: هەرچەندە لەلایەن وەزارەتی کارەبای هەرێمەوە ئاگادارکراوینەتەوە کە هیچ لێدوانێک لەبارەی کەمبوونەوەی دابەشکردنی کارەباوە بۆ راگەیاندنەکان نەدەین، بەڵام ئەو رێژە کارەبایەی کە لەبەردەستە ئێجگار کەمە و لە 24 سەعاتدا دەتوانرێت تەنها چەند سەعاتێکی کەم کارەبا بە هاووڵاتیان بدرێت.

ئەو سەرچاوەیە کە نەیویست ناوی ئاشکرا بکرێت، دەشڵێت: هیچ وادەیەک دیارنییە بۆ ئاسایی بوونەوەی دۆخی پێدانی کارەبا بە هاووڵاتیان و ئەو بڕیارە لای وەزارەتی سامانە سروشتیەکان و وەزارەتی کارەبایە.

ئەمەش لەکاتێکدایە، لەڕۆژانی رابردوودا وەزارەتی کارەبا راگەیەندراوێکی بڵاوکردەوە و ئاماژەی بەوەدا، بەهۆی هێرشەکانی ئێرانەوە بۆ سەر هەولێر بڕی بەرهەمهێنانی گازی سروشتی بۆ وێستگەکانی کارەبا کەمیکردووە، ئەمەش وایکردووە 2500 بۆ 3000 هەزار وات بەرهەمهێنانی کارەبا کەمببێتەوە.

بەپێی راگەیەنراوەکەی وەزارەتی کارەبا "دەتوانرێت لە 24 سەعاتدا 12 سەعات کارەبای نیشتمانی بدرێت بە هاووڵاتیان"، بەڵام لەئێستادا هاووڵاتیان تەنها چەند سەعاتێکی کەم کارەبای نیشتمانییان لە پرۆژەی رووناکییەوە پێدەگات کە لەشەو و رۆژێکدا تێپەڕناکات لە 4 سەعات.

ئەمەش لەکاتێکدایە، وڵاتی ئیران کە لەماوەی 3 رۆژی رابردوودا بە بەردەوامی هێرشی موشەکی و درۆنی لەسەرە هیچ حاڵەتیکی کارەبا بڕین لە پارێزگاکانی رووینەداوە، هەروەها بەهۆی هێرشەکانی ئێرانیشەوە بۆ سەر وڵاتانی( کوێت، بەحرەین، ئیمارات، قەتەر، ئیسرائیل، ئەردەن) هیچ کام لەم وڵاتانە دووچاری نەبوونی کارەبا نەبوونەتەوە، بەڵام هەر لەگەڵ دەستپێکردنی گرژییەکان لەناوچەکە حکومەتی هەرێم بەرهەمهێنانی گازی سروشتی بۆ وێستگەکانی کارەبا راگرت و لەپرۆژەی رووناکیەوە پارێزگاکانی تاریک کرد.

PUKMEDIA