سودانی: رێگە نادەین عیراق پەلکێشی ناو ململانێکان بکرێت

مەکتەبی راگەیاندنی سەرۆک وەزیران

کۆبونەوەی ئەنجومەنی وەزیران

لەکۆبونەوەیەکی نائاسایی ئەنجومەنی وەزیراندا سودانی رایگەیاند: رووبەرووی هەر هەوڵێک دەبینەوە ئاسایشی وڵات تێکبدات و رێگە بە هیچ لایەنێک نادەین عیراق پەلکێشی ناو ململانێکان بکات.

محەمەد شیاع سوودانی، سەرۆکوەزیرانی عیراق و فەرماندەی گشتیی هێزە چەکدارەکانی عیراق، سەرپەرشتی کۆبوونەوەیەکی نائاسایی ئەنجومەنی وەزیرانی بۆ ئاسایشی نیشتمانی کرد و فەرمانی بە هێزە ئەمنییەکان کردووە رووبەڕووی هەر هەوڵێک ببنەوە کە ئاسایشی وڵات تێکدەدات و جەختیکردەوە: رێگە بە هیچ لایەنێک نادەین عیراق پەلکێشی ناو ململانێکانی ناوچەکە بکات، بڕیاری شەڕ و ئاشتی تەنها لە دەسەڵاتی دەوڵەتدایە.

سودانی ئەوەشی راگەیاند: حکومەت پابەند دەبێت بە پاراستنی باڵیۆزخانەکان و دامەزراوە هەستیارەکان و رێگریکردن لە هەر هێرشێک بۆ سەریان.

 لە کۆبوونەوەکەدا باس لە لێکەوتە ئابوورییەکانی شەڕی ناوچەکە کرا و وەزیرانی پەیوەندیدار پلانەکانی خۆیان بۆ دابینکردنی سووتەمەنی، وزە و ئاسایشی خۆراک خستە ڕوو.

PUKMEDIA