ڕفعەت عەبدوڵڵا: ڕاپەڕین کوردی لە لێواری لەناوچونەوە هێنایەوە سەر سەحنەی مێژوو

نوسینگەى رۆژنامەوانى ڕفعەت عەبدوڵڵا

ڕفعەت عەبدوڵڵا جێگری سەرۆکی یەکێتیی نیشتمانیی کوردستان

ڕفعەت عەبدوڵڵا جێگری سەرۆکی یەکێتیی نیشتمانیی کوردستان، پەیامێکی لە ساڵیادی راپەڕینە مەزنەکەی گەلەکەمان بڵاو کردەوە و رایگەیاند: ڕاپەڕین وەک وەرچەرخانێکی گرنگ، کوردی لەلێواری لەناوچون و حەتمیەتی سڕینەوەوە هێنایەوە سەر سەحنەی مێژوو.

دەقی پەیامەکەی ڕفعەت عەبدوڵڵا:


بەشانازییەوە یادی ڕاپەڕینە مەزنەکەی گەلەکەمان لەبەهاری 1991 دەکەینەوە، کە 5ی3 ڕانیەی دەروازە چەخماخەی وەرچەرخانێکی مێژوویی خوڵقاندو لە 7ی3 سلێمانی مژدەی زەماوەندی ئازادی بەکوردستانداو لە 11ی3 دادو هەقی جەماوەری ڕاپەڕیوی هەولێر، بەعسی ڕاماڵی و لە20ی3 کەرکوک، تاجی ڕزگاری ڕاپەڕینی لەسەرنا.

ڕاپەڕین وەک وەرچەرخانێکی گرنگ، کوردی لەلێواری لەناوچون و حەتمیەتی سڕینەوەوە هێنایەوە سەر سەحنەی مێژوو، بەخۆڕاگری و ئیرادەی میللەتەکەمان کوردستانی بۆ قۆناغی حکومداری گواستەوەو گەلێک دەسکەوتی گەورەی بەدیهێنا، ئەمڕۆش بەتەبایی و یەکگرتوویی، بەها بەرزەکانی ڕاپەڕین دەپارێزین.

لەم بۆنە مێژووییەدا، گەرمترین پیرۆزبایی لەگەلەکەمان دەکەین و سڵاو بۆ پێشمەرگە قارەمانەکان دەنێرین و بەڕێزو شکۆوە لەبەردەم کێلی بەرزی شەهیداندا دەوەستین.

ڕفعەت عەبدوڵڵا
جێگری سەرۆکی یەکێتیی نیشتمانیی کوردستان

PUKMEDIA