کۆسرەت رەسول: پلانى راپەڕینمان دانا و لە رانیەوە دەستمان پێکرد

PUKMEDIA

کۆسرەت رەسول عەلی و هەڤاڵانى

لە یادى 35 ساڵەى راپەڕینە مەزنەکەى کوردستان، کۆسرەت رەسول عەلی رایگەیاند: (35)هەمین ساڵیادی راپەڕینی گەلی کوردستان دژی رژێمی فاشیستی بەعس لە سەرجەم کوردستانیان پیرۆز دەکەم، ئاواتەخوازم ئەم یادە پیرۆزە بکەینە هەوێنی تەبایی و یەکڕیزی گەلەکەمان.

لە پەیامێکدا روونیشى کردەوە: 35 ساڵ لەمەوبەر، بە یەکڕیزی نێوان هێزە کوردستانییەکانی ناو بەرەی کوردستانی، بە پاڵپشتی و پشتیوانی جەماوەری راپەڕیوی کوردستان و رێکخستنە نهێنییەکان و شانە چەکدارەکان، پلانی راپەڕینمان دانا و گەلەکەمان لە رانیەی دەروازەی راپەڕینەوە لە دژی زوڵم و زۆری و ستەمی رژێمی بەعس راپەڕی و لە ماوەیەکی یەکجار کورتدا بەعس و بەعسییەکانی کوردستان بەدەر کرد و  گەلەکەمان بووە خاوەن حوکمڕانی خۆماڵی و هەڵبژاردنی ئازاد ئەنجام درا و حکومەتی هەرێمی کوردستان پێکهات.

ئەوەشى خستەڕوو: ئەمڕۆ کە یادی راپەڕین و ئازادکردنی کوردستان لە چنگی رژێمی بەعس دەکەینەوە، ناوچەکە بە دۆخێکی یەکجار سەخت و دژوار تێپەڕ دەبێت، گەلەکەمان لە هەموو کات زیاتر پێویستی بە یەکڕیزی و تەبایی هەیە، ئەرکە لەسەر هێز و لایەنە سیاسییەکان یەکگرتوو بن و لە پێناو پاراستنی دەستکەوتەکانی گەلەکەمان و گەیشتن بە ئاواتی لە مێژینەمان و پاراستنی کوردستان لە هەر گرژی و ململانێیەک پێکەوە خەبات بکەن و بەرەنگاری ئاڵنگارییەکان ببنەوە.

لە کۆتایى پەیامەکەیدا ئاماژەى بۆ ئەوە کردووە: دووبارە ساڵیادی راپەڕین و ئازادکردنی سەرجەم شا رو شارۆچکەکانی کوردستان لە کوردستانیان پیرۆز دەکەم و سەری رێز و نەوازش بۆ شەهیدان دادەنوێنم.

PUKMEDIA