رۆژی جلی کوردی، لە پێشنیارێکەوە بۆ نەریتێکی نیشتمانی

PUKMEDIA

چەند دیزاینێکی جلی کوردی و خشڵەکانی

ئەمڕۆ 10ی3، لە سەرانسەری هەرێمی کوردستان، بە رۆژی جلی کوردی دیاریکراوە، کە هێشتا نەبووەتە یاسا، بەڵکو سەرەتا بڕیاری وەزارەتێک بوو، دوایش تەواوی دام و دەزگاکانی هەرێمی گرتەوە، بەبێ پابەند بوونێکی یاسایی.

 بەپێی بەدواداچونێکی PUKMEDIA، پەرلەمانی کوردستان، هیچ پرۆژە یاسا، یان یاسا و بڕیارێکی دەرنەکردووە، بۆ ئەوەی 10ی3ی هەموو ساڵێک بە رۆژی جلی کوردی دیاریبکرێت، بەڵکو وەزارەتی پەروەردە لە ساڵی 2011، وەک پێشنیار داوای کرد، خوێندکاران لەو رۆژەدا جلی کوردی بپۆشن، دواتریش، پێشنیارەکە وەک بڕیاری لێهات، مامۆستا و خوێندکارانی خوێندنی باڵاش، لەو رۆژەدا جلی کوردیان پۆشی، پاشان وەک کلتورێکی ساڵانەی نەتەوەیی، تەواوی فەرمانگەکانی گرتەوە،بەبێ پابەندبوونێکی یاسایی، هۆکاری دیاریکردنی ئەو رۆژەش وەک خۆ ئامادەکردنێک دێت بۆ سەری ساڵی کوردی و یادەکانی نەورۆز.

جلی کوردی، دوای ئاڵا و خاک، بەیەکێک لە سیمبولە دیارەکانی گەلی کورد دادەنرێت، تیایدا ژنان و پیاوان بەشێوەیەکی  جلی ئاڵ و خۆیان دەگۆڕن، کە کورد لە نەتەوەکانی دیکە جیا دەکاتەوە.
جلی کوردی پیاوان، زیاتر خۆی لە ستارخانی و مراخانی و ڕانک و چۆغە و شاڵ و کەتافی، دەبینێتەوە، جلی کوردی ژنانیش لە کەواو سەڵتە و هێلەک و ئاوەڵکراس پێکدێن، بەپێی سەردەمیش گۆڕانکاری بە مۆدێل و دیزاینەکانیدا دێت.

زۆربەی خەڵکی کوردستان، لەبۆنە و ئاهەنگەکاندا جلی کوردی دەپۆشن، لە هەر پارچەیەکی کوردستان جلوبەرگی تایبەت بە خۆیان هەیە، هی باکور جیاوازە لە باشور و هی رۆژهەڵات جیاوازە لە رۆژئاوا، هاوکات لە وەرزی بەهار و بەتایبەت لە وەرزی نەورۆزدا، خەڵکی نۆرە لەسەر دوورینی جلی کوردی دەگرن و زیاتر لە نەورۆزدا جلی کوردی دەپۆشرێت.

PUKMEDIA