خێرە زەنگی مەترسی تەنها بۆ شاری سلێمانی لێ دەدەن؟

PUKMEDIA

بارەگای بۆردی راگەیاندنی یەكیتیی نیشتمانیی كوردستان

بەشی هەڵسەنگاندن و بەدواداچوونی  بۆردی راگەیاندنی یەکێتیی نیشتمانیی کوردستان، رەخنە لە  رووماڵی  کەناڵێک لە هەولێر دەگرێت، کە رایانگەیاندووە: بەهۆی بۆردومانەکانەوە ژینگەی سلێمانی ژەهراوی بووە، دووپاتیشی دەکاتەوە: ئەگەر مەترسییەک هەبێت بۆ تەواوی شارەکانی هەرێمی کوردستان و ناوچەکەیە، لە سەروی هەموویانەوە هەولێری پایتەخت.

دەقی راگەیەندراوەکە:

كاتێك هەموو شتێك بە سیاسی بكرێت و سیاسەتكردنیش بە رق و كینە و پەیامی رق و كینەش لەرێگەی كەسانی دەمشڕ و قەڵەم فرۆش ئاراستە بكرێت، ئەوكاتە بەدڵنیاییەوە كەش و هەواش بە سیاسی دەكرێت، بۆیە لە گەشتی سەعات 7ی شەوی 9 لەسەر 10 ی ئەم مانگە، كەناڵێك لە هەولێر وەك پیشەی هەمیشەیی خۆیان بەناوی كەش و هەواوە، رمە ژەهراوییەكەی ئاراستەی شاری سلێمانی كرد و رایگەیاند: كە خەڵكی سلێمانی فریای خۆتان بكەون ژیانتان لەمەترسیدایە، ژەهرەكەی ئێستای شارەكەتان بەهۆی شەڕی ئێران و ئەمریكا و ئیسرائیلەوە لە كیمیابارانی هەڵەبجە مەترسیدارترە)!.

نكۆڵی لەوە ناكرێت كە بۆردومانەكان زیانی هەیە و ئاگاداركردنەوەی هاووڵاتیانیش كارێكی باشە، بەڵام بۆچی تەنها شاری سلێمانی لە مەترسیدا بێت! ئەگەر پاشماوەی بۆردومانەكان زیانی بۆ ژینگە و بۆ سەر ژیانی مرۆڤ هەبێت، ئەوا ژیانی (90) ملیۆن هاووڵاتی لەئێران لە پێش هاووڵاتیانی سلێمانی لە مەترسیدایە، چونكە شارەكانی ئەو وڵاتە رۆژانە لەژێر بۆردومانی دژواردان، پاشان مەترسی بۆ سەر هاووڵاتیانی دەوروبەری ئێران دەبێت و لەوانە توركمانستان، ئازەربایجان، توركیا، عیراق ئەرمینیا، ئەفغانستان، پاكستان، كوێت، بەحرەین، ئوردن، عەرەبستانی سعودیە، قەتەر، عومان، هەروەها ئیسرائیل هەیە، كە ژمارەی هاووڵاتیانی ئەو وڵاتانە سەدان ملیۆن كەسە، خێرە ئێوە تەنها زەنگی مەترسی بۆ شاری سلێمانی لێ دەدەن و دەڵێن فریای خۆتان بكەون.

بۆچی ژەهری شەڕ و  بۆردومانكردنی (13) وڵات تەنها روو بكاتە سلێمانی؟!

وەلێ ئەگەر خەمی ئێوە تەنها خەمی خەڵكی كوردستانە، ئەوا شارەكانی رۆژهەڵاتی كوردستان رۆژانە بە چڕی بۆردومان دەكرێن، بۆچی مەترسی بۆ ئەوان نابێت و تەنها مەترسی لەسەر شاری سلێمانی دەبێت؟! خۆ ئەگەر مەبەستتان تەنها بۆردومانكردنی هەرێمی كوردستانە، ئەوا مەترسییەكە زیاتر لەسەر شاری هەولێری پایتەخت هەیە، چونكە لە 80%ی بۆردومانەكانی هەرێمی كوردستان لە سنوری پارێزگای هەولێر و بەتایبەت شاری هەولێری خۆشەویست بووە.

خۆ ئەگەر ئەمە تەنها سیناریۆیەكە بۆ ترساندنی خەڵكی سلێمانی، ئەوا خەیاڵتان خاوە و سلێمانی بە پەیامە ژەهراوییەكان نەترساوە و ناشترسێت.

بەشی هەڵسەنگاندن و بەدواداچوونی
                                         بۆردی راگەیاندنی (ی.ن.ك)
PUKMEDIA