گرانبونى نرخى نان و سەموون رەتدەکرێتەوە

کوردسات نیوز

نانەواخانە

گرانبوونى نرخى نان و سەموون رەتدەکرێتەوە و سەرۆکى سەندیکاکانى کوردستانیش رایدەگەیەنێت: پاش کۆبوونەوەمان لەگەڵ قائمقامیەتى سلێمانى بڕیارمانداوە نرخى نان و سەموون وەکو خۆى بمێنێتەوە و لەبەرامبەریشدا قائیمقامیەتى سلێمانى بەڵێنى پێداوین کە غازمان بەهەمان نرخى پێشتر پێ بدرێت.

دەروون رزگار سەرۆکى سەندیکاکانى کوردستان لە کۆنگرەیەکى رۆژنامەوانیدا رایگەیاند: ئەمڕۆ کۆبووینەوە لەگەڵ نوێنەرى نانەواخانە و سەموونخانەکان بەخۆشحاڵییەوە لە قائیمقامیەتەوە بەڵێنمان پێدرا، کە نرخى غازمان بەهەمان شێوەى پێشوو کە بۆ هەر بتڵێک هەشت هەزار و 500دینارە پێ بدرێت، لە بەرامبەریشدا نوێنەرى نانەواخانە و سەموونخانەکانى سلێمانى لە کۆبوونەوەکەدا بەڵێنیاندا ئەگەر ئەو گرفتەیان بۆ چارەسەر بکرێت نرخى نان و سەموون وەک خۆى دەهێڵنەوە.

راشیگەیاند: لەچەند رۆژى ئایندەدا دابەشکردنى غاز لە سنورى پارێزگاى سلێمانى ئاسایى دەبێتەوە و ئەو گرفتە کەمەشى لەم چەند رۆژەى رابردوودا هەبووە، کاریگەرى ناکاتە سەر گرانبوونى نرخى نان و سەموون و کەمکردنەوەى کێشى گونک.

ماوەى چەند رۆژێکە دابەشکردنى غاز کەمبوەتەوە و ئەمەش گرفتى بۆ نانەواخانە و سەموونخانەکان لە هەرێمى کوردستان بەگشتى دروستکردووە و لەبەرامبەر ئەمەشدا نانەواخانە و سەموونخانەکان رایانگەیاندبوو، ئەگەر کێشەکەمان بۆ چارەسەرنەکرێت چوار نان دەکەین بە هەزار دینار، بەڵام ئەمڕۆ کێشەکەیان بۆ چارەسەر کرا و بەمەش نرخى نان و سەموون وەک خۆى مایەوە.

PUKMEDIA