ژماره‌ی ئاواره‌ و كوژراوانی 10 رۆژی رابردووی لوبنان راگه‌یه‌ندرا

الشرق الاوسط

هێرشى ئاسمانى بۆ سەر لوبنان

ده‌سه‌ڵاتدارانی لوبنان ئاواره‌بوونی نزیكه‌ی 760 هه‌زار كه‌سیان تۆماركردوه‌، كه‌ به‌هۆی شه‌ڕ‌ی نێوان حزبوڵڵا و ئیسرائیله‌وه‌ ئاواره‌بوون، ئه‌مه‌ش له‌كاتێكدایه‌ هێرشه‌ ئاسمانییه‌كانی ئیسرائیل بۆ سه‌ر باشووری لوبنان و گه‌ڕ‌ه‌كه‌كانی باشووری به‌یروت ده‌ستیپێكرد، دوای ده‌ركردنی هۆشداری بۆ چۆڵكردنی ئه‌و گه‌ڕه‌كانه‌.

ئه‌و جه‌نگه‌ی رۆژهه‌ڵاتی ناوه‌ڕاستی گرتووه‌ته‌وه‌ پریشكی به‌ر لوبنانیش كه‌وتووه‌ و حیزبوڵڵای لوبنان ده‌یه‌وێت تۆڵه‌ی گیانله‌ده‌ستدانی عه‌لی خامنه‌یی، ڕ‌ێبه‌ری شۆڕ‌شی ئیسلامیی ئێران له‌ ئیسرائیل بكاته‌وه‌ و له‌یه‌كه‌م رۆژی بڵاوبوونه‌وه‌ی گیانله‌ده‌ستدانی عه‌لی خامنه‌یی هێرشه‌كانی بۆ سه‌ر ئیسرائیل ده‌ستپێكردوه‌، له‌به‌رامبه‌ریشدا ئیسرائیل به‌هێرشی ئاسمانی به‌رفراوان بۆ سه‌ر لوبنان وه‌ڵامی هێرشه‌كانی داوه‌ته‌وه‌.

یه‌كه‌ی به‌ڕ‌ێوه‌بردنی كاره‌ساته‌كانی حكومه‌تی لوبنان له‌نوێترین بڵاوكراوه‌یدا ئاماژه‌ بۆ ئه‌وه‌ده‌كات، كه‌ له‌ 2ی ئازاره‌وه‌ 759 هه‌زار و 300 كه‌س ئاواربوون كه‌ له‌ناویاندا زیاتر له‌ 122 هه‌زار كه‌س له‌په‌ناگه‌كانی حكومه‌تدان.

ده‌سه‌ڵاتدارانی ئه‌و وڵاته‌ش قوتابخانه‌ و دامه‌زراوه‌ گشتییه‌كانیان كردوه‌ به‌ شوێنی حه‌وانه‌وه‌ بۆ ئاواره‌كان، وه‌ك شاری وه‌رزشی به‌یروت، هه‌روه‌ها شانه‌ی به‌ڕ‌ێوه‌بردنی مه‌ترسی و كاره‌ساته‌كان له‌ نوسینگه‌ی سه‌رۆكوه‌زیرانی لوبنان، بڵاویكرده‌وه‌، له‌ هێرشه‌ ئاسمانییه‌كانی ئیسرائیلدا بۆ سه‌ر وڵاته‌كه‌یان 570 كه‌س كوژراون و هه‌زار و 444 كه‌سی دیكه‌ش برینداربوون.

PUKMEDIA