ژێرخانی نەوتی عیراق لە نێوان کاولکارییەکانی جەنگ و پەککەوتنی هەناردەدا

PUKMEDIA

بۆری گواستنەوەی نەوتی هەرێم

ئەو بۆریانەى کە نەوتى عیراقى پێ هەناردەى بەندەرى جەیهان دەکرێت، سەرجەمیان لەلایەن تیرۆرستانەوە تەقێندراونەتەوە و کار ناکەن پسپۆرێکى ئابوریش دەڵێت پێویستیان بە نۆژەنکردنەوە هەیە، بەڵام لە ئێستادا عیراق ئەو توانایەى نییە، ئەو بۆریانە نۆژەن بکاتەوە.   

د. بەهجەت ئەحمەد پسپۆڕ لە بواری وزە و گرێبەستەکانی نەوت و گاز تیشک دەخاتە سەر دۆخی نالەباری ژێرخانی گواستنەوەی نەوتی عیراق و بە وێبسایتی رەسمی یەکێتیی نیشتمانیی کوردستان PUKMEDIAی راگەیاند: لە ئێستادا کە هێڵە ستراتیجییەکان و ئەو بۆریانەی کە نەوتی کێڵگەکانی باشووری عیراق دەبەستنەوە بە کەرکوکەوە و لە رێی حکومەتی هەرێمی کوردستانیش کە بە بەندەری جەیهانەوە بەستراوەتەوە، بەهۆی جەنگی 2003 و هێرشەکانی تیرۆریستانی داعش و کردەوەی تێکدەرانەوە، تووشی کاولکارییەکی زۆر بوون، ناتوانرێت ئاوا نەوتی پێ هەناردە بکرێت.

ناوبراو روونیکردەوە: کە ئەم هێڵانە پێویستیان بە نۆژەنکردنەوەی بنەڕەتی هەیە، بەڵام لە بارودۆخی ئێستادا ئەنجامدانی ئەو کارە مەحاڵە.

سەبارەت بە نەوتی کەرکوکیش، د.بەهجەت ئەحمەد وتی: "ئێستا کەرکوک ڕۆژانە 300 هەزار بەرمیل بەرهەم دەهێنێت، کە هەمووی بۆ پێداویستی ناوخۆی پارێزگاکانی باکووری عیراق تەرخانکراوە، هەر هەوڵێک بۆ هەناردەکردنی، کەمی سووتەمەنی لە ناوخۆی وڵاتدا دروست دەکات."

PUKMEDIA