هێرشە درۆنییەکانی شەوی رابردووی هەرێم زیانی گیانی لێکەوتەوە

GK

هێرشە درۆنییەکانی هەولێر

شەوی رابردوو چەند هێرشێکی درۆنی کرایە سەر سلێمانی و هەولێر و کۆیە و بەپێی زانیارییەکان هێرشەکانی سلێمانی و کۆیە زیانی گیانی نەبوەو هێرشەکەی سەر هەولێریش 13 کەس تێیدا بریندرابوون.

دوای ئەوەی شەوی رابردوو دەنگی دوو تەقینەوە لە سلێمانی بیسترا، لەبارەیەوە عەقید کارزان شێرکۆ، وتەبێژی دەزگای ئاسایشی هەرێم رایگەیاند: ئەو دەنگانەی لە ئاسمانی سلێمانی بیستران، تێکشکاندنی دوو درۆن بووە و هیچ زیانێکی نەبووە، کە لە نزیک هێزەکانی 70 خراونەتە خوارەوە و دەنگەکەش بەهۆی کەوتنەخوارەوەی پارچەی درۆنەکانەوە بووە.

هاوکات هەر شەوی رابردوو هێرشی درۆنی کرایە سەر هەولێر و بەپێی ئەو زانیاریانەی لە سەرچاوەیەکەوە لە هەولێر راگەیەندراوە، لە هێرشەکاندا 13 كەس برینداربوو.

سەرچاوەکە ئاماژەی بەوەشداوە، بریندارەکان گەیەندراونەتە نەخۆشخانەی فریاكەوتنی ڕۆژئاوا لە هەولێر، كه خەڵكی جوتسایدی باداوان و برینەكانیان زۆر قورس نین.

لەلایەکی تریشەوە کۆیەش لە هێرشی شەوی رابردوو بێبەش نەبوەو لەو باریەوە عەلی عەبدوڵا، بەرێوبەری پۆلیسی كۆیە رایگەیاندوە: سەعات 11 و 30 دەقیقەی شەوی رابردوو دەنگی سێ تەقینەوە لە سنووری كۆیە بیستراوە، بەڵام هیچ بۆردومانێك بەر سەنتەری شارەكە نەكەوتووەو هیچ ئاسەواری تەقاندنەوەیەكیش لەسەنتەری شارەكە نەكەوتۆتە خوارەوە .

ئەمەش لە کاتێکدایە لەسەرەتای دەستپێکی شەری ئەمریکا و ئیسرائیل لەگەڵ ئێران، کە زیاتر لە 15 رۆژی خایاندووە، هەرێمی کوردستان و عیراقیش لە هێرشی درۆنی بێبەش نەبون و ناوە ناوە هێرشی درۆنی دەکرێتە سەر شارەکانی هەرێم، بەتایبەت سلێمانی و هەولێر و گیانلەدەستدان و برینداری لێکەوتۆتەوە.

PUKMEDIA