شاناز ئیبراهیم ئەحمەد: ئاشتی پێویستی بە کردارە

PUKMEDIA

خاتوو شاناز ئیبراهیم ئەحمەد

شاناز ئیبراهیم ئەحمەد خانمى یەکەمى عیراق، لە 38هەمین ساڵیادى کیمیابارانى هەڵەبجەدا پەیامێکى بڵاوکردەوە و رایگەیاند: یادی هەڵەبجە وەبیرمان دێنێتەوە کە ئاشتی پێویستی بە کردارە، نەک هەر دروشم و ئاشتی بە دروشمبازی نایەتەدی لەکاتێکدا لەسەر زەمینی واقیع توندوتیژی بەردەوامە.

 دەقى پەیامەکە:

یادی هەڵەبجە وەبیرمان دێنێتەوە کە ئاشتی پێویستی بە کردارە، نەک هەر دروشم

لەساڵیادی بۆردومانی هەڵەبجە بەچەکی کیمیایی لەرۆژی 16ی ئازاری 1988دا، رێز لەو قوربانیانە دەنێین کە باجی بێدەنگیی و فەرامۆشیی جیهانیان دا. چونکە ئاشتی بە دروشمبازی نایەتەدی لەکاتێکدا لەسەر زەمینی واقیع توندوتیژی بەردەوامە.

‎ئەگەر جیهان گوێی بۆ نوزەی بەساڵاچوان، هاوار و ناڵەی ژنان و دڵەکوتێ ونیگەرانیی منداڵ بگرتایە، ڕووبەڕووی ئەم مەرگەساتانەی ئەمڕۆ نەدەبوینەوە.

‎ئەگەر ژیانی مرۆڤ بەهای راستەقینەی هەبوایە لای ئەو کەسانەی خۆیان لەپشت چڵە زەیتونە نایلۆنەکانەوە حەشار داوە و بانگەواز بۆ ئاشتی دەکەن، خۆرهەڵاتی ناوەڕاست نەدەبوە گۆڕەپانی جەنگ. ئەگەر ژیانی مرۆڤ لەبەرمیلێک نەوت بە نرختر بوایە، نە مەرگەساتی هەڵەبجە و نەئەو جەنگانە ئەقەومان کە ئەمڕۆ دەیبینین.

شاناز ئیبراهیم ئەحمەد

PUKMEDIA