يه‌كێتی بڕیاری تاكلایه‌نه‌ بۆ پرسه‌ چاره‌نوسسازه‌كان ره‌تده‌كاته‌وه

PUKMEDIA

لۆگۆی یەکێتیی نیشتمانیی کوردستان

یەکێتیی نیشتمانیی کوردستان هەمیشە دژی ئەوەبووە ژیان و گوزرەرانی خەڵک بۆ مەرامی سیاسی بەکاربهێنرێت و لەوپێناوەشدا هەوڵی زۆری داوە، هاوکات بەغدادی بەقوڵایی ستراتیژی کارکردن داناوەو پێیوابووە پێویستە کێشەکان لەوێوە چارەسەربکرێن، لەم بارودۆخەی ئێستاشدا رێگریکردن لە هەناردەکردنەوەی نەوت بەبڕیارێکی نادروست و تاکلایەنانە دەزانێت.

سه‌رۆك بافڵ: نابێت حكومه‌تی هه‌رێم تاك لایه‌نانه‌ بڕیار بدات

بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان له‌په‌یامێكدا ئاماژه‌ بۆ ئه‌وه‌ده‌كات: نابێت ئه‌و بڕ‌یارانه‌ی كه‌ كاریگه‌رییان هه‌یه‌ له‌سه‌ر چاره‌نووس و ژیانی گه‌له‌كه‌مان، به‌ شێوه‌یه‌كی تاكلایەنانە بدرێن، حكومه‌تی هه‌رێمی كوردستان حكومه‌تێكی بنكه‌فراوانه‌ و ده‌بێت هه‌موو لایه‌نه‌كان به‌گوێره‌ی ئه‌وه‌ هه‌ڵسوكه‌وت بكه‌ن.

سه‌رۆك بافڵ راشیگه‌یاند: ئێستا كاتی گرژی و ئاڵۆزی یان تۆماركردنی خاڵی سیاسی نییه‌، خه‌ڵكه‌كه‌مان شایه‌نی ئه‌وه‌یه‌ كه‌ ژیانێكی سه‌قامگیری هه‌بێت و له‌كاتی خۆیدا مووچه‌كانیان وه‌ربگرن، ئێستا كاتی یه‌كڕ‌یزییه‌ له‌ به‌رامبه‌ر ئه‌و مه‌ترسییه‌ گه‌ورانه‌ی كه‌ ده‌كرێت تووشمان ببن و ئێمه‌ پاڵپشتی له‌ دیالۆگی بنیاتنه‌رانه‌ ده‌كه‌ین له‌گه‌ڵ هاوبه‌شه‌كانمان له‌ به‌غداد و هه‌ولێر بۆ پاراستنی سه‌قامگیریی هه‌رێمی كوردستان و عیراق.

پێویستە لە بەغدادەوە کێشەکان چارەسەربکرێن

لای یەکێتیی نیشتمانیی کوردستان خەڵک گرنگترین ناوەندە و هەرگیز ناچێتە ژێر باری هیچ جۆرە بڕیارێکەوە کە هاووڵاتی و مووچەخۆران باجەکەی بدەن.

لوقمان وەردی ئەندامی سەرکردایەتی یەکێتی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند : پەیامەکەی سەرۆکی یەکێتی تەئکیدکردنەوەیە لەوەی کە بۆ یەکێتی خەڵک سەنتەرە و پێویستە هەر کارێک کە دەکرێت لەپێناو بەرژەوەندی گشتیدا بێت، لەئێستاشدا کە بارودۆخی ناوچەکە بە گشتی و عیراق و هەرێمی کوردستان بەتایبەتی لەڕووی سیاسی وئابوورییەوە ناسەقامگیرن، پێویستە زیاتر بیر لەبەرژەوەندی خەڵک بکرێتەوە نەک بەبڕیاری سیاسی و حزبی چارەنووسی میللەتەکەمان بخرێتە مەترسییەوە.

راشیگەیاند: یەکێتی هەمیشە دژی ئەوەبووە کە ژیان و گوزرەرانی خەڵک بۆ مەرامی سیاسی بەکاربهێنرێت، بۆیە هەمیشە رامانگەیاندووە، کە بەغداد قوڵایی ستراتیژی کارکردنمانە و پێویستە لە بەغدادەوە کێشەکانمان چارەسەر بکەین نەک بە پێچەوانەوە  

لەبارەی هەناردەکردنەوەی بەشێک لە نەوتی عیراق لەڕێگەی بۆرییە نەوتەکانی هەرێمی کوردستانەوە لوقمان وەردی ئاماژەی بەوەکرد:  دروستکردنی هەر لەمپەڕێک بۆ هەناردەکردنی نەوت کارێکی خراپە و کاریگەری دەبێت لەسەر مووچەی مووچەخۆرانمان، بۆیە یەکێتی بەهیچ شێوەیەک ناچێتە ژێر باری بڕیارێک کە هاووڵاتی و مووچەخۆران باجەکەی بدەن، بەپێچەوانەوە پێمان وایە رێگریکردن لە هەناردەکردنەوەی نەوت بڕیارێکی نادروست و تاکلایانەیە.

دانوستان چاره‌سه‌ره‌ نه‌ك دژایه‌تی و ركابه‌ری

ئەندامێکی سەرکردایەتی یەکێتیی نیشتمانیی کوردستان رایدەگەیەنێت: گرنگه‌ هه‌ولێر و به‌غداد گفتوگۆ و دانوستان بكه‌نه‌ سه‌رچاوه‌ی چاره‌سه‌ر و دووربكه‌ونه‌وه‌ له‌ تۆمه‌تبار كردنی یه‌كتر، چونكه‌ دواجار گه‌له‌كه‌مان زه‌ره‌رمه‌ند ده‌بێت.

هه‌ر له‌و باره‌یه‌وه‌ له‌تیف نێروه‌یی ئه‌ندامی سه‌ركردایه‌تی یه‌كێتیی نیشتمانیی كوردستان به‌ PUKMEDIA ی راگه‌یاند: هه‌ڵوێسته‌كانی یه‌كێتی روونن و هه‌ر پرسێك خزمه‌ت به‌ گه‌له‌كه‌مان بكات، یه‌كێتی پشتیوانی ده‌كات، بۆیه‌ بێ لایه‌نی له‌م بارودۆخه‌ی كه‌ هه‌یه‌ باشترین بژارده‌یه‌ بۆ دوورخستنه‌وه‌ی مه‌ترسییه‌كان له‌ناو ماڵی خۆمان و پێویسته‌ هه‌موو هه‌وڵه‌كان له‌پێناو سه‌قامگیری وڵاته‌كه‌مان بێت.

راشیگه‌یاند: به‌شداریكردن له‌ جه‌نگه‌كه‌ راسته‌وخۆ بێت یان ناڕاسته‌وخۆ، ژێرخانی ئابووری وڵات به‌ ته‌واوه‌تی هه‌ڵده‌وه‌شێنێته‌وه‌و مه‌ترسی جددی له‌سه‌ر ئاسایشی وڵات دروست ده‌كات، بۆیه‌ گرنگه‌ هه‌ولێر و به‌غداد گفتوگۆ و دانوستان بكه‌نه‌ سه‌رچاوه‌ی چاره‌سه‌ر و دووربكه‌ونه‌وه‌ له‌ تۆمه‌تبار كردنی یه‌كتر، چونكه‌ دواجار گه‌له‌كه‌مان زه‌ره‌رمه‌ند ده‌بێت.

ئەمەش لەکاتێکدایە، بەهۆی داخستنی گەروی هورمزەوە، جیهان رووبەڕوی کەمی وزە بووەتەوە و نرخی نەوتیش لە بەرزبوونەوەی بەردەوامدایە، ئەمریکاش هەوڵدەدات زۆرترین بڕی نەوت هەناردە بکرێت و نرخەکەی سەقامگیر بێت، لەم چوارچێوەیەشدا سیاسەتی یەکێتیی نیشتمانیی کوردستان یەکانگیرە لەگەڵ سیاسەتی جیهانی نەوت، هاوکات بەرژەوەندی هاووڵاتیانیش وادەخوازێت لە ئێستادا لەمپەر بۆ هەناردەی نەوتی عیراق دروست نەکرێت و قەیرانێکی دیکە لەگەڵ حکومەتی فیدڕاڵ سەرهەڵنەدات.

PUKMEDIA