وەزارەتی پێشمەرگە: بەمەبەستی تێكدانی ئاسایشی ناوچەكە هێرش دەكرێتە سەر بارەگاكانمان

PUKMEDIA

لۆگۆی وەزارەتی پێشمەرگە

وەزارەتی پێشمەرگە رایدەگەیەنێت: بە توندی ئیدانەی هێرشكردنەسەر بارەگایەكی هێزەكانمان لەسنووری چەمچەماڵ دەكەین، كە ئامانج لێی تێكدانی ئاسایش و سەقامگیریی ناوچەكەیە، داواش لەفەرماندەی گشتیی هێزە چەكدارەكانی عیراق دەكات سنوورێك بۆ ئەم دەستدرێژییە بێپاساوانە دابنێت.

وەزارەتی پێشمەرگەی حكومەتی هەرێم، ئەمڕۆ 22ی ئاداری 2026، رایگەیاند: شەوی رابردوو، جارێكی دیكە تاقمە تیرۆریستییە لەیاسا دەرچووەكان دەستیان دایەوە كردەوەیەكی تێكدەرانەو لەڕێگەی درۆنێكی بۆمبڕێژكراوەوە هێرشیان كردە سەر بارەگایەكی هێزەكانی پێشمەرگە لەسنووری چەمچەماڵ، بە توندی ئیدانەی ئەم پەلامارە دەكەین كە ئامانج لێی تێكدانی ئاسایش و سەقامگیریی ناوچەكەیە.

راشیگەیاند: دووبارەبوونەوەی ئەم هێرشە تیرۆریستییانە بۆ سەر بارەگاكانی پێشمەرگە لە كاتێكدایە كە دۆخی ناوچەكە بەگشتی لەبەردەم قۆناغێكی هەستیار و ئاڵۆزدایە.

وەزارەتی پێشمەرگە ئاماژەی بەوەشكردووە: جارێكی تر داوا لەفەرماندەی گشتیی هێزە چەكدارەكانی عیراق دەكەین كە سنوورێك بۆ ئەم دەستدرێژییە بێپاساوانە دابنێت كە دەكرێنە سەر بارەگاكانی پێشمەرگە.

PUKMEDIA