هەڵسەنگاندن بۆ بڕى پارە و پێدانى کارەباى موەلیدەکان دەکرێت

میدیاکان

موەلیدە

هەرچەندە بەشێک لە خاوەن موەلیدە ئەهلییەکان لە سنوورى پارێزگاى سلێمانى بۆ جارى دووەم بڕى حەوت هەزار دیناریان بۆ یەک ئەمپێر لە هاووڵاتییان وەرگرتووە، بەڵام لە ئێستادا نوێنەرى خاوەن موەلیدەکان و قائیمقامییەتى سلێمانى لە کۆبووونەوەدان بۆ یەکلاى کردنەوەى ئەو بابەتە.

شەوى رابردوو راگەیاندنى قائیمقامییەتى سلێمانى لە راگەیەنراوێکدا ئاماژەى بە ئەوەداوە: بە هیچ شێوەیەک پارەى موەلیدە مەدەن و لە داهاتوودا لەسەر ئەو بابەتە ئاگادارتان دەکەینەوە.

ئەمەش لە کاتێکدایە، بەشێک لە خاوەن موەلیدەکانى سنوورى پارێزگاى سلێمانى لە چەند رۆژى رابردوودا بڕى حەوت هەزار دیناریان بۆ هەر ئەمپێرێک لە هاووڵاتییان وەرگرتووە، ئەمە جگە لەوەى پێشتریش لەگەڵ کەمبوونەوەى کارەباى نیشتمانى بەهۆى جەنگى نێوان ئێران و ئیسرائیل بڕى حەوت هەزار دیناریان بۆ هەر ئەمپێرێک وەرگرتبوو.

هاوکات سەرچاوەیەک لە قائیمقامیەتى سلێمانى بە PUKMEDIA  راگەیاند: لە ئێستادا نوێنەرى موەلیدە ئەهلییەکان و لیژنە تایبەتمەندەکانى قائیمقامییەت لە کۆبوونەوەدان بۆ یەکلایى کردنەوەى ئەو پرسە.

بە پێى زانیارییەکانى سەرچاوەکە، چاوەڕوان دەکرێت لە کۆتایى ئەم مانگەدا هەردوولا هەڵسەنگاندن بۆ پێدانى بڕى کارەبا و نرخى گاز لەماوەى رابردوودا بکەن و ئەگەر ئەو کارەبایەى لە لایەن خاوەن موەلیدەکانەوە دراوە بە هاووڵاتییان پارەکەى لەو بڕە زیاتر بوو کە وەرگیراوە، پێویستە هاووڵاتییان بڕێک پارەى دیکە بدەنە خاوەن موەلیدەکان، بەڵام ئەگەر خاوەن موەلیدەکان پارەى هاووڵاتییانیان کەوتە لا پێویستە بیگەڕێننەوە.

هەرچەندە هێشتا بەشیکى زۆر لە خاوەن موەلیدەکان بڕى دووەمى پارەی کارەبایان لە هاووڵاتییان وەرنەگرتووە، بەڵام بەشێکى دیکەیان لە دوو رۆژى رابردوودا بۆ هەر ئەمپێرێک بڕى حەوت هەزار دیناریان لە هاووڵاتییان وەرگرتووە، لە بەرامبەریشدا قائیمقامیەتى سلێمانى خاوەن موەلیدەکانى ئاگادار کردووەتەوە کە پارە وەرگرتن رابگرن، هەتا کۆتایى ئەم مانگە هەڵسەنگاندنى بۆ دەکرێت.

PUKMEDIA