دابەشکردنی نەوت دەستپێدەکاتەوە

کوردسات نیوز

دابەشکردنی نەوت

وتەبێژی نەوت و کانزاکانی سلێمانی رایدەگەیەنێت: بەهۆی ئەم باردۆخەوە پرۆسەی دابەشکردنی نەوت راگیرابوو، بڕیارە لەسەرەتای ئەم هەفتەیەوە پرۆسەکە دەستپێبکەینەوە.

سەلام عومەر وتەبێژی نەوت و کانزاکانی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: ماوەیەکە دابەشکردنی نەوتمان بەسەر شار و شارۆچکەکانی سلێمانیدا راگرتووە و بەهۆی ئەم بارودۆخەشەوە نەوتمان بۆ نەهاتووە.

راشیگەیاند: پرۆسەی دابەشکردنەکە لە مەڵبەندی شەشدا وەستا و بەشێکی ئەو مەڵبەندە ماون نەوت وەربگرن، بڕیاریشە سەرەتای هەفتەی داهاتوو لە مەڵبەندی شەشەوە دەست بەدابەشکردنەوەی نەوت بکەینەوە.

هاووڵاتیانی هەرێمی کوردستان لەساڵی 2017دا کۆبۆنی نەوتیان بۆ ماوەی 8 ساڵ بۆ کراوە، هاوکات وەرگرتنی ئەم نەوتە کە بە بەشی ساڵی 2025 هەژمار دەکرێت کۆتا دابەشکردن دەبێت کە بەو کۆبۆنە وەربگیرێت، هەر خێزانێکیش ئەو کۆبۆنەی نەبێت نەوتی پێنادرێت.

ئەمەش لەکاتێکدایە، ساڵانی رابردوو هەر خێزانێک لەناوچە سنورییەکان 400 لیتر نەوت و بۆ ناو پارێزگاکانیش بڕی 200 لیتر نەوتیان پێدەدرا، لەبەرامبەر هەر بەرمیلێک نەوتیشدا 104 هەزار دینار وەردەگیرا، بەڵام لەئەمساڵدا ئەو بڕە نەوتە بۆ ناو پارێزگاکان کەمکرایەوە بۆ 100 لیتر واتە نیو بەرمیل، کە لەبەرامبەردا بڕی 31 هەزار دینار لەهاووڵاتیان وەردەگیرێت، ئەمەش نرخی پاڵپشتیکراوە لەلایەن حکومەتی عیراقەوە.

PUKMEDIA