وەزارەتی داد: لێکۆڵینەوە لەگەڵ هەزار داعش تەواو بووە

ئاژانسی واع

گرتوخانەی کەرخ

وەزارەتی دادی عیراق رایگەیاند: شوێنی دەستبەسەرکردنی تیرۆریستانی داعش بە چەندین پشتێنەی ئەمنی پارێزراوەو لێکۆڵینەوە لەگەڵ هەزار داعش تەواو بووە و هەوڵەکان دەستیان پێکردووە بۆ ئیمزاکردنی یاداشتی لێکتێگەیشتن لەگەڵ ئەو وڵاتانەی دەیانەوێت هاووڵاتییانی خۆیان وەربگرنەوە.

ئاژانسی هەواڵی رەسمی عیراق لە زاری ئەحمەد لەعێبی، وتەبێژی وەزارەتی داد، رایگەیاند: ئەندامانی ڕێکخراوە تیرۆریستییەکە لە ئێستادا لە زیندانی ناوەندیی کەرخ دەستبەسەرن و لە ئێستادا ناگوازرێنەوە بۆ هیچ شوێنێکی تر، ئاماژەی بەوەش دا: وەزارەت شوێنی دەستبەسەرکردنی تیرۆریستانی لە ڕێگەی چەندین پشتێنەیەکی ئەمنییەوە پاراستووە کە لەلایەن هێزەکانی دەزگای دژەتیرۆر و کارمەندانی فەرمانگەی چاکسازیی عیراقەوە سەپێنراون.

ئەوەشی خستە ڕوو: تیرۆریستەکان هێشتا لەژێر پرۆسەی لێپرسینەوەدان و لێکۆڵینەوە لەگەڵ هەزار کەسیان ئەنجام دراوە، بەڵام تا ئێستا هیچ سزایەکی دادوەرییان بەسەردا نەسەپێنراوە، جەختیشی کردەوە کە ئەگەر سزای لەسێدارەدان بەسەر هەر تیرۆریستێکدا بسەپێنرێت، مەرجە سزاکە پلەی کۆتایی (بنەبڕ) وەربگرێت و لەلایەن سەرۆک کۆمارەوە پەسەند بکرێت.

وتەبێژەکە وتیشی: هیچ کام لەو وڵاتانەی کە تیرۆریستانی داعش ڕەگەزنامەکەیانیان هەڵگرتووە، داوای گواستنەوەی هاووڵاتییانی خۆیان نەکردووە بۆ تەواوکردنی ماوەی سزاکانیان لە وڵاتی خۆیان، وەزارەتی داد لەوانەیە لە داهاتوودا یاداشتی لێکتێگەیشتن لەگەڵ ئەو وڵاتانە ئیمزا بکات کە ئارەزوو دەکەن هاووڵاتییە تیرۆریستە سزادراوەکانیان وەربگرنەوە دوای دەرچوونی حوکمەکان بەسەریاندا، جگە لەو زیندانییانەی کە سزای لەسێدارەدانیان بۆ دەرچووە.

PUKMEDIA