قوباد تاڵەبانی: هەوڵەكانمان بۆ پاراستنی كوردستان بووە

راگەیاندنی قوباد تاڵەبانی

كۆبوونەوەی قوباد تاڵەبانی لەگەڵ هەردوو كونسوڵی گشتیی فەڕەنسا و ئیتاڵیا

قوباد تاڵەبانی، جێگری سەرۆكوەزیران، بەجیا لەگەڵ یان برێم، كونسوڵی گشتیی فەڕەنسا و تۆماس سانسۆنی، كونسوڵی گشتیی ئیتاڵیا لە هەرێمی كوردستان كۆبووەوە و لە هەردوو كۆبوونەوەكەدا ئاڵوگۆڕی بیروڕا كرا لەبارەی دۆخی ئاڵۆزی ناوچەكە و كاریگەرییەكانی لەسەر عیراق و هەرێمی كوردستان.

لە هەردوو كۆبوونەوەكەدا كە رۆژی یەكشەممە 5ی 4ی 2026، لە سەرۆكایەتی ئەنجومەنی وەزیران لە هەولێر بەڕێوەچوون، قوباد تاڵەبانی رایگەیاند: سەرباری ئەوەی ئەم جەنگە كاریگەریی خراپی بۆ سەر هەموو ناوچەكە و بە تایبەتیش عیراق و كوردستان هەبووە، بەڵام هەموو هەوڵی سەركردایەتیی سیاسیی كورد بۆ ئەوە بووە هەرێمی كوردستان و عیراق پارێزراوبن و بە كەمترین زیان ئەم قۆناغە سەختە تێپەڕێنن. 

جێگری سەرۆكوەزیران ئاماژەی بەوەشدا: لەم دۆخەدا هەوڵی تەواویان داوە بۆ ئەوەی دامەزراوەكانی حكومەت بەكارایی و بەهێزی بمێننەوە و بەردەوام بن لە پێشكەشكردنی خزمەتگوزاری بە هاووڵاتییانی كوردستان.

هەر لەم چوارچێوەیەدا قوباد تاڵەبانی بە پێویستی زانی لەم دۆخە سەختەدا میدیا ناوخۆیی و جیهانییەكانیش بە بەرپرسیارێتییەوە مامەڵە لەگەڵ رووداوەكاندا بكەن و رەچاوی پاراستنی ئاسایشی نیشتمانی و سەر و ماڵی هاووڵاتییان بكەن و خۆیان بە دوور بگرن لە بڵاوكردنەوەی هەر چەشنە بابەتێك كە خەڵك تووشی ترس و دڵەڕاوكێ بكات.

سەبارەت بە پەیوەندییەكانی نێوان هەرێمی كوردستان و حكومەتی فیدراڵیش، جێگری سەرۆكوەزیران رایگەیاند كار دەكەن بۆ ئەوەی گفتوگۆی بنیاتنەرانە لەنێوان هەردوولادا هەبێت بۆ چارەسەركردنی كێشە و ناكۆكییەكان.

PUKMEDIA