مۆنۆمێنتی ئەنفال لەناحيەی نەوجولی گەرمیان كرايەوە

PUKMEDIA

مۆنۆمێنتی ئەنفال لە ناحیەی نەوجولی گەرمیان

بە ئامادەبوونی کەسوکاری ئەنفالکراوان و خەڵکی دەڤەرەکە، رۆژی ٢٠٢٦/٤/٧ مۆنۆمێنتی ئەنفال لە ناحیەی نەوجولی گەرمیان کرایەوە.

مۆنۆمێنتەکە بە دیزاینێکی شایستە لەسەر دوو دۆنم زەوی پرۆژەکە ئەنجام دراوەو لە مەراسیمەکەدا کە رێکخراوەکانی بواری ئەنفال و کۆمەڵەی داکۆکی لە قوربانیان و کەسوکاری ئەنفالکراوان رێکیانخستبوو، سوپاسی یەکێتیی نیشتمانیی کوردستان و شێخ ئەحمەد حەمە کەریم ئەندامی مەکتەبی سیاسی و سالار مەحمود ئەندامی سەرکردایەتیان کرد بۆ هاوکاریکردنی دروستکردنی پرۆژەکە.

رێزلێنانی کەسوکاری قوربانیانی ئەنفالی دەڤەری داویە پێشکەشی سالار مەحمود کرا و چەندین وتارو پەخشانە شیعر پێشکەش کراو تاجەگوڵینە لەسەر مەزارەکە دانرا.

مەکتەبی دارایی و ئیدارەی گشتی یەکێتیی نیشتمانیی کوردستان تێچووی دروستکردنی پرۆژەکەی دابین کردوە.

ئەنفال تاوانێکی نێودەوڵەتییەو جینۆسایدە، لەساڵی ١٩٨٨ لەلایەن رژێمی بەعسەوە بەهەشت قۆناغ ئەنجام دراوە. ١٨٢٠٠٠ سەدو هەشتاو دوو هەزار کەس لە ژن و مناڵ و پیرو گەنج بونە قوربانی و زیاتر لە ٤٥٠٠ گوند روخێنران و ژێرخانی ئابوری و مرۆیی کوردستان وێران کرا.

لە قۆناغی سێی شاڵاوی ئەنفال ناوچەی گەرمیانی گرتەوەو بەهەزاران کەس بونە قوربانی و سەدان گوند روخێنران.

PUKMEDIA