داهاتی نەوتی عیراق زیاتر لە 70% کەمی کردووە

ئاژانسەکان

کێڵگە نەوتییەکان

 وەزارەتی نەوتی عیراق، ئەمڕۆ دووشەممە 13-4-2026، کۆی هەناردەی نەوت و داهاتی بەدەستهاتووی بۆ مانگی ئازار راگەیاند، کە بەراورد بە مانگی شوبات دابەزینێکی گەورەی تۆمارکردووە، بەشێوەیەک کەدەگاتە زیاتر لە 70% ی داهاتی مانگەکانی پێشووی.

بەپێی ئامارەکانی کۆمپانیای بەبازاڕکردنی نەوتی عیراق سۆمۆ، کە کۆپییەکی دەست PUKMEDIA  کەوتوە، بڕی هەناردەی نەوتی خاو هەژدە ملیۆن و 604  هەزار و 951 بەرمیل بووە، کە داهاتەکەی گەیشتووەتە زیاتر لە یەک ملیار و 957 ملیۆن و 121 هەزار دۆلار.

هەر بەپێی ئامارەکە کۆی بڕی هەناردەکراوی نەوتی خاو بۆ مانگی ئازار لە کێڵگە نەوتییەکانی ناوەڕاست و باشووری عیراق 14 ملیۆن و 561 هەزار و 534 بەرمیل بووە، لە کاتێکدا بڕی هەناردەکراوی نەوتی هەرێمی کوردستان لە رێگەی بەندەری جەیهانەوە  یەک ملیۆن و 271 هەزار و 200 بەرمیل بووە، هەروەها بڕی هەناردەکراوی نەوتی کەرکوک لە رێگەی بەندەری جەیهانەوە دوو ملیۆن و 772 هەزار و 217 بەرمیل بووە.

ئەمە لە کاتێکدایە کە عیراق لە مانگی شوبات 99 ملیۆن و 872 هەزار و 220 بەرمیل نەوتی هەناردە کردبوو، کە داهاتەکەی زیاتر لە 6 ملیار و 814 ملیۆن و 585 هەزار دۆلار بوو.

لە کاتی بەراوردکردندا دەردەکەوێت کە هەناردەی نەوتی عیراق لە مانگی ئازاردا بە زیاتر لە 81 ملیۆن بەرمیل کەمی کردووە، بەمەش داهاتی نەوت بە نزیکەی 5 ملیار دۆلار دابەزیوە، ئەوەش بەهۆی جەنگ و ئەو گرژییانەی کە ناوچەکە بەخۆیەوەی بینیوە.

PUKMEDIA