د.هه‌ڤاڵ ئه‌بوبه‌كر: په‌یوه‌ندی سلێمانی و كه‌ركوك كلتورێكی مێژووییه‌

راگەیاندنی پارێزگاری سلێمانی

د.هەڤاڵ ئەبوبەکر پارێزگاری سلێمانی و رێبوار تەها پارێزگاری کەرکوک

ئەمڕۆ 13ی4ی2026 ڕێبوار تەها پارێزگاری کەرکوک، سەردانی دیوانی پارێزگای سلێمانی کرد و لەلایەن د.هەڤاڵ ئەبوبەکر پارێزگاری سلێمانی و جێگرانی پارێزگارەوە پێشوازیی لێکرا.

دواتر لە کۆنگرەیەکی رۆژنامەوانیدا د.هه‌ڤاڵ ئه‌بوبه‌كر پارێزگاری سلێمانی رایگەیاند: ئەمڕۆ بەشانازییەوە لەدیوانی پارێزگای سلێمانی پێشوازیمان لە رێبوار تەها پارێزگاری شاری کەرکوکی زێڕینی دێرینی خۆشەویست کرد، ئەو شارەی هەموو جیهان چاوی لەسەریەتی، بەڵام ئێمە دڵ و رۆح و گیانمان لەگەڵیەتی، سلێمانی و کەرکوک بەدرێژایی مێژووی کۆن و نوێ دووانەیەکی لێکدانەبڕاو بوون، سوپاسیان دەکەین کە لەسەردەمی حکومڕانی خۆجێی کاک رێبوار و تیمەکەیدا زۆر زۆر هاوکار و پشتیوانی حکومەتی خۆجێی سلێمانی بوون لەهەموو بارودۆخێکدا.

راشیگەیاند: بەدرێژایی مێژوو کەرکوک و سلێمانی پەیوەندییەکی باشیان هەبووە و پارێزگا-ری شارەکەش هەمیشە سەرقاڵی دروستکردنی پردە لەنێوان خۆیان و شارەکانی دیکەدا بەتایبەت شاری سلێمانی، ئەمڕۆش ئەو بەڵێنەمان دووپاتکردەوە کە وەک هەمیشە کەرکوک و سلێمانی دەکەینە نمونەیەک شانازی پێوە بکرێت و کاری هاوبەشیشمان پێکەوە دەبێت.

رێبوار کەریم: هەرگیز پاڵپشتییەکانی سلێمانیمان لەبیرناچێت

هاوکات رێبوار تەها پارێزگاری کەرکوک رایگەیاند: ئەمڕۆ دڵخۆشین بە سەردانیکردنمان بۆ شاری سلێمانی و کۆبوونەوەمان لەگەڵ پارێزگاری سلێمانی، ئەوە راستییە کە کەرکوک و شاری سلێمانی هەمیشە ئاگایان لەیەکتر بووە و ئاگامان لە خەڵکی هەولێریش بووە و هەولێرییەکان تاجی سەرن، لەئێستادا قۆناغێکی باشـمان بڕی و لەماوەی ساڵێک و 6 مانگی رابردوو رووبەڕوی ململانێی زۆربووینەوە، ئەمڕۆ هاتووین سوپاسی د.هەڤاڵ و خوشک و براکانمان بکەین لە دیوانی پارێزگاری سلێمانی کە هەمیشە ئاگایان لێمان بووە و رۆڵێکی باشیان لەسەرکەوتنەکانمان هەبووە.

راشیگەیاند: بەخۆشحاڵییەوە ئەمڕۆ ئێمە لەکەرکوک هەستی هاووڵاتی بوونمان بۆ کەرکوکییەکان دروستکردووە و پێکەوە ژیانێک لەنێوان پێکهاتەکانی کەرکوک دروستبووە، کە پێشتر نەبووە و کۆمەڵانی خەڵکی کەرکوک متمانەیان بە حکومەتی خۆجێی شارەکە هەیە و شاری سلێمانیش هەمیشە دەرگای بۆ ئێمە کراوە بووە و لەبیرمان ناچێت کە چەند هاوکارمان بوون.

PUKMEDIA