ئێزیدییەکان جەژنی سەری ساڵ دەکەنەوە

ئاژانسەکان

جەژنی ئێزیدییەکان

سێیەم چوارشەممەی مانگی نیسان جەژنی سەری ساڵی ئێزیدییە کە کۆنترین جەژنیانە و بەو بۆنەیەوە لە لالش ئاهەنگ دەگێڕن و 365 چرا دادەگیرسێنن و خۆراک بەسەر هەژاراندا دابەش دەکەن.

جەژنی سەری ساڵ بە چوارشەممەی سور-یش ناسراوە، کە لە ئێوارەی رۆژی سێشەممەوە دەستپێدەکات و ئێزیدییەکان ماڵەکانیان دەڕازێننەوە و سەردانی گۆڕی ئازیزانیان دەکەن، پاشان بۆ رۆژی دواتر کە یەکەم چوارشەممەی رۆژژمێری رۆژهەڵاتی ئێزیدییەکان و سێیەم چوارشەممەی رۆژژمێری زاینییە لە پەرستگای لالشەوە  دەست بە ئاهەنگێڕان دەکەن، کە لەلایەن بابا شێخی ئیزدییەکانەوە سەرپەرشتیی دەکرێت و ئاگر لە پەرستگەکە دەکرێتەوە و دواتر 365 چرا دادەگیرسێنن، کە بە واتای ژمارەى رۆژەکانی ساڵ دێت و واتا و مەبەستی ئاگرکردنەوە لەو پەرستگەیە، دوورخستنەوەی ڕۆحە خراپەکان و ئاماژەی هاتنی خێر و خۆشییە.

لە چوارشەممەی سووردا هەموو خێزانێکی ئێزدی ژمارەیەک هێلکەی کوڵاو ئامادە دەکەن و و دواتر دەستدەکەن بە رەنگکردنیان و بەسەر ماڵە هەژارەکاندا دابەشی دەکەن، هەروەها ئەوان لەو مانگەدا هاوسەرگیری ناکەن و لەو باوەڕەدان بەهار مانگی پشکوتنی گوڵ و گوڵزارە.

ئێزدییەکان لە ساڵێکدا شەش جەژنیان هەیە، ئەوانیش جەژنا رۆژیێن ئیزى، چوارشەمما نیسان، خدر ئەلیاس، جەژنا چلەى هاوینێ و چلەى زستانێ، جەژنا قوربان.

سەرژمێرییەکان بۆ ئێزدیییەکان لەعیراق نیشانی دەدەن 500 بۆ 700 ھەزار کەسن و کەوتوونەتە ھەردوو شاری شێخان باکووری پارێزگای موسڵ ‌و شنگال لەسەر سنووری سوریا، بەدرێژی 80 کلیۆمەتر لەدووری پارێزگای موسڵ، کە چەندین شارۆچکەو گوندی گەورەو بچوک ‌و ئۆردوگای نیشتەجێبوون لەخۆدەگرن و ھاوکات قەزای زاخۆو سمێڵ لە پارێزگای دھۆک.

PUKMEDIA