سودانی: بەردەوامین لەپشتگیری ئێزدییەکان

نوسینگەی رۆژنامەوانی سەرۆکوەزیرانی عیراق

محەمەد شیاع سودانی سەرۆک وەزیرانی عیراق

ئەمڕۆ چوارشەممە سەرۆکی ئەنجومەنی وەزیران، بەبۆنەی هاتنەوەی جەژنی سەری ساڵی ئێزیدییەکان پەیامێکی پیرۆزبایی بڵاوکردەوە و رایگەیاند: بەردەوامین لە پێشکەشکردنی پشتگیری تەواو بۆ رۆڵەکانی ئەم پێکهاتەیە و دابینکردنی مافەکانیان.

محەمەد شیاع سودانی سەرۆک وەزیرانی عیراق لە پۆستێکدا لە تۆڕی کۆمەڵایەتی (X) ڕایگەیاند: جوانترین پیرۆزبایی ئاراستەی رۆڵەکانی گەلەکەمان لە پێکهاتەی ئێزیدی لە عیراق و تەواوی جیهان دەکەین بەبۆنەی هاتنەوەی جەژنی سەری ساڵی ئێزیدی، هیوای جەژنێکی خۆش و داهاتوویەکی پڕ لە ئاشتی و ئارامی و خۆشەویستییان بۆ دەخوازین.

وتیشی: لەم بۆنەیەدا، قوربانییەکانی ئێزیدییەکان لە بەرگریکردن لە شارەکانیان لە بەرامبەر تاقمە تیرۆریستەکانی داعش بەرز دەنرخێنین، جەختیشیکردەوە لەسەر بەردەوامبوون لە پێشکەشکردنی پشتگیری تەواو بۆیان و پابەندبوونمان بە دابینکردنی مافەکانیان، جێبەجێکردنی داواکارییەکانیان و ئاوەدانکردنەوەی ناوچەکانیان، ئەمەش ئەو ڕێچکەیەیە کە حکومەتەکەمان سوور بووە لەسەر جێبەجێکردنی، لەبەر باوەڕبوونی بەوەی کە چەسپاندنی چەمکی هاوڵاتیبوون و چەسپاندنی دادپەروەری و پاراستنی مافەکان، کۆڵەکەی سەرەکییە بۆ بنیادنانی دەوڵەتێکی بەهێز و خاوەن سەروەری کە خزمەتی هەموو هاوڵاتیانی بکات.

PUKMEDIA