رێکخراوی پەیامنێران: نیگەرانین لەڕفاندنی پەیامنێری کەناڵ 8 لەهەولێر

كەناڵ8

ئەیوب وەرتی پەیامنێری كەناڵ8

پەیامنێرێكی كەناڵ8 و تیمەكەی لەهەولێر رفێندران، كەناڵ8یش رایدەگەیەنێت: ئەندامانی تیمەكە لەكاتی ئەنجامدانی كاری پیشەیی خۆیاندا بوون و لەلایەن هێزێكی ئەمنی پارتی دیموكراتی كوردستانەوە رفێندراون، هاوكات رێكخراوی پەیامنێرانیش لەڕاگەیەندراوێكدا نیگەرانی خۆی دەردەبڕێت و داوای ئازادكردنی خێرای تیمەكە دەكات.

ئەمڕۆ 16ی 4ی 2026، ئەیوب وەرتی پەیامنێری كەناڵ8 و تیمەكەی لەهەولێر رفێندران، كەناڵ8 یش لەڕاگەیەندراوێكدا ئاماژە بەوەدەكات: تیمەكەیان لەكاتی كاركردن لەسەر پاڵاوگەكان و ژینگەی هەولێر، لەلایەن هێزێكی ئەمنی پارتی دیموكراتی كوردستانەوە رفێندراون.

 لەوچوارچێوەیەشدا، رێكخراوی پەیامنێران بۆ ماف و گەشەپێدان، كە یەكێكە لەو رێكخراوانەی داكۆكی لەمافی رۆژنامەنووسان لە هەرێمی كوردستان دەكات، نیگەرانییەكی قوڵی لەبارەی رووداوەكەوە دەربڕی و رایگەیاند: نیگەرانین لەدەستگیركردنی تیمی كەناڵ8 لەلایەن هێزی لیوای نەوت و گاز لەسنووری پارێزگای هەولێر،  كە لەكاتی ئەنجامدانی ئەركی پیشەیی خۆیاندا بوون بۆ ئامادەكردنی راپۆرتێكی میدیایی لەسەر ژینگەی كوردستان.

راشیگەیاندووە: ئێمە  لەڕێكخراوی پەیامنێران باوەڕمان وایە كە ئەم رووداوە پێویستی بە هەڵسەنگاندنێكی ورد و شەفاف هەیە، بەتایبەتی لەڕووی پاراستنی ئازادیی راگەیاندن و رێزگرتن لەمافە بنەڕەتییەكانی رۆژنامەوانان، كە بەشێكی گرنگن لەسیستەمی دیموكراسی و حوكمرانیی باش.

هاوكات رێكخراوی پەیامنێران جەخت دەكات لەسەر پێویستی رێزگرتن لەكاری پیشەیی رۆژنامەوانان و رێگەدان بەیان بۆ ئەنجامدانی ئەركەكانیان بە بێ ترس و سەركوت، هاوكات داوای ئازادكردنی خێرای ئەندامانی تیمەكە دەكەین  بە شێوەیەك كە هاوتا بێت لەگەڵ یاسا و پێوانە نێودەوڵەتیەكان.

رێكخراوەكە ئاماژەی بەوەشكردووە: ئێمە بانگەشە دەكەین بۆ هەموو دەسەڵاتە پەیوەندیدارەكان كە پەیوەندیدانی باشتر لەگەڵ میدیا پەرەپێبدەن و هەوڵ بدەن بۆ دروستكردنی ژینگەیەكی لەبار بۆ كاری رۆژنامەوانی، بە جۆرێك كە هاوتا بێت لەگەڵ بەڵێننامەو پابەندبوونی هەرێمی كوردستان بە پێوانە و رێككەوتننامە نێودەوڵەتی.

PUKMEDIA