رێبوار تەها: لەگەڵ پارێزگار بەردەوام دەبین لەخزمەتی کەرکوکییەکان

PUKMEDIA

رێبوار تەها، پارێزگاری پێشووی كەركوك

رێبوار تەها، پارێزگاری پێشووی كەركوك، لەپەیامێكدا دوای سوپاسكردنی سەرۆك بافڵ و متمانەو پشتیوانی بەردەوامی كەركوكییەكان رایگەیاند: كەركوك جێناهێڵم و بەردەوام دەبم لەخزمەتكردنی كەركوكییەكان، هاوكات دەسەڵاتی ئەمجارەی پارێزگار جیاواز دەبێت و بڕیارەكان بە هاوبەشی دەدرێن.

سوپاسی سەرۆك بافڵ جەلال تاڵەبانی دەكەم

شەوی رابردوو 16ی 4ی 2026، دوای ئاڵوگۆڕ لە پۆستەكانی پارێزگای كەركوك، رێبوار تەها، پارێزگاری پێشووی كەركوك، پەیامێكی ڤیدیۆیی بڵاوكردەوەو رایگەیاند: سوپاسی سەرۆك بافڵ جەلال تاڵەبانی دەكەم كەمتمانەی پێدام ببم بەپارێزگار، وتیشی: لەماوەی كاركردنم وەك پارێزگاری كەركوك، روبەڕوی كۆمەڵێك ئاڵنگاری گەورەی ئەمنی و دارایی و كارگێڕی بووینەوە، بەشێوەیەك لەماوەی یەك ساڵ و 8 مانگی كاركردنمدا بودجە بۆ كەركوك نەهات، تەنها بڕێكی كەم لەبودجەی پتڕۆ دۆلارمان بۆ دەهات كە تەنها دەكاتە 7% ی بودجەی ساڵێكی پارێزگارەكانی پێشوو، خۆئەگەر تەنها یەك لەسەر چواری بودجەی پارێزگارەكانی پێشووم بۆ بهاتایە، كەركوكم دەكرد بە شارێكی دیكە.

چەند ساڵی داهاتوو ئەنجامی كارەكانمان بەتەواوی دەردەكەون

راشیگەیاند: نەوەستاین لە خزمەت و چووینەوە ناو خەڵك و كاری جدییمان كرد بۆ ئەوەی متمانە بگەڕێنینەوە بۆ نێوان خەڵك و حكومەت و گیانی پێكەوەژیان بۆ نێو پێكهاتەكانی كەركوك، هاوكات خزمەتگوزاریمان گەیاندە گوندو گەڕەكە پشتگوێخراوەكانی كەركوك و كۆمپانیای وەبەرهێنانی راستەقینەمان هێنایە شارەكە، بێگومان چەند ساڵی داهاتوو ئەنجامی كارەكانمان بەتەواوی دەردەكەون، چونكە زۆر بەرپرسیارانە كارمانكرد.

 لەكەركوك دەمێنمەوەو خزمەت دەكەم

رێبوار تەها ئاماژەی بەوەشكرد: هەرچەندە بۆ هەڵبژاردنی ئەنجومەنی نوێنەرانی عیراق، 97 هەزار دەنگم بەدەستهێناو چەندین جاریش لەبەغداد پۆستم پێدرا، بەڵام كەركوكم جێنەهێشت، تەنها دەمەوێت لەكەركوك بم و خزمەت بكەم، بڕیارمداوە ئەگەر فەرمانبەرێكیشبم لەم شارە دەمێنمەوە، هاوكات  بە كەركوكییەكان و جوتیاران دەڵێم ئێوە بێكەس نین و ناهێڵم جارێكی دیكە بێكەسبن.

ناهێڵم جارێكی دیكە كورد بێبەشكرێت

ئەوەشی خستەڕوو: هەر بۆ خزمەتی كەركوكییەكان پۆستی جێگری یەكەمی پارێزگاری كەركوكم قبوڵكردووەو نامەوێت جارێكی دیكە كورد بێبەشكرێت، بە بەردەوامبوونیشم رێگەنادەم ئەو پڕۆژانەی كەبونیادمانناوە بەتەواونەكراوی بەجێبهێڵدرێن.

پێویست بوو بڕیارێك بدەم  لەبەرژەوەندی خەڵك و كەركوكییەكان بێت

پارێزگاری پێشووی كەركوك راشیگەیاند: لەم بارودۆخەدا پێویست بوو بڕیارێك بدەم كە لەبەرژەوەندی خەڵك و كەركوكییەكان بێت، هەرچەندە بۆ من ئاسان نییە، بەڵام دەبێت خزمەتەكانم بەردەوامبن، بۆ ئەوەش پێویستم بەپشتیوانی خەڵكی كەركوكەو دڵنیاتان دەكەمەوە ئەم دۆخە تێدەپەڕێت و كۆتایی نییە.

سێ جار هەوڵی تیرۆركردنم درا

وتیشی: لەماوەی ساڵێك و شەش مانگدا، سێ جار هەوڵی تیرۆركردنم درا، جگە لە  خۆخۆری خۆمان و راگەیاندنە دژەكان، بەڵام لە خزمەتكردنی شاری كەركووك بەردەوام بووم و بەردەوامیش دەبم، دەسەڵاتی ئەمجارەی پارێزگاری كەركوك جیاواز دەبێت لەگەڵ من، چونكە سەرجەم دەسەڵاتە دارایی و كارگێڕیییەكان بەهاوبەشی دەبن لەگەڵ هەردوو جێگرەكەیداو دڵنیابن ناهێڵین جارێكی دیكە كوموكوڕی رووبدات.

رێبوار تەها لەكۆتایی پەیامەكەشیدا رایگەیاند: لەسەر رێبازەكەی سەرۆك مام جەلال بەردەوام دەبین بۆ كەركوك و كەركوكییەكان، ئەم قۆناغە تێدەپەڕێت و بەرەو داهاتوویەكی باشتر هەنگاو دەنێین.

PUKMEDIA 

 دەقی پەیامە ڤیدیۆییەكەی رێبوار تەها: