ئاسۆ مامەند: سەرۆک بافڵ هاوکار و پاڵپشتییەکی بەهێزی سەرجەم پێکهاتەکانی کەرکوکە

کوردستانی نوێ

ئاسۆ مامەند سەرپەرشتیاری کەرکوک-سەڵاحەدینی یەکێتیی نیشتمانیی کوردستان

ئاسۆ مامەند سەرپەرشتیاری کەرکوک-سەڵاحەدینی یەکێتیی نیشتمانیی کوردستان، لە ڕاگەیەندراوێكدا سوپاسی هەوڵ و ماندووبوونەکانی سەرۆک بافڵ جەلال تاڵەبانی سەرۆكی یەكێتیی نیشتمانیی كوردستان دەكات كە هاوکار و پاڵپشتییەکی بەهێز بووە بۆ سەرجەم پێکهاتەکانی کەرکوک.

دەقی ڕاگەیەندراوەكە:
هاووڵاتییانیی خۆشەویست
-دانیشتوانی خۆڕاگری کەرکوک
سەرەتا بە پێویستی دەزانم کە دەستخۆشی و سوپاسی بەڕێز رێبوار تەها پاڕێزگاری پێشووی کەرکوک بکەم، کە توانیی لە ماوەی دەستبەکاربوونیدا وەک پارێزگارێکی سەرکەوتوو خزمەتی دانیشتوانی ئازیزی کەرکوک بکات بەبێ جیاوازیی و بە شێوەیەکی بەرپرسیارانە مامەڵە لەگەڵ نەتەوە و پێکهاتەکاندا بکات، هەروەک هەڵمەتی پڕۆژەی خزمەتگوزاری بگەیەنێتە تەواوی شار و شارۆچکەکان تەنانەت بە گوندەکانیشەوە، لەگەڵ ئەوەشدا توانیی سەقامگیری سیاسی و پەیوەندییە کۆمەڵایەتییەکانی نێوان پێکهاتەکانی شاری کەرکوک بپارێزێت.

هەروەها جێی خۆیەتی سوپاسی هەوڵ و ماندووبوونەکانی سەرۆک بافڵ بکەم کە بە هەستکردنیان بۆ دۆخی تایبەتی کەرکوک و لە بەرچاوگرتنی پاراستنی پێکەوە ژیان و دەستەبەرکردنی سەقامگیری سیاسی و کۆمەڵایەتی و تیگەیشتنیان بۆ ئەم دۆخە، هاوکار و پاڵپشتییەکی بەهێز بووە بۆ سەرجەم پێکهاتەکانی کەرکوک.

-هاووڵاتییانی ئازیزی کەرکوک.
ئەڵبەت پڕۆسەی ئاڵوگۆڕی پۆستی پارێزگاری کەرکوک، مێژووەکەی دەگەڕێتەوە بۆ رێککەوتنێک کە دوو ساڵ لەمەوبەر لە نێوان پێکهاتەکانی کەرکوک بە کورد و عەرەب و تورکمانەوە ئەنجامدراوە، ئامانجی هەموو لایەکیش خزمەتکردنی هاووڵاتییانیی کەرکوک و پاراستنی ئاسایش و سەقامگیرییە لەم پارێزگایە، لەم سۆنگەیەوە ئەم مۆدێلە لە دەستاودەستکردنی دەسەڵات، دەکەین بە نەریتێک بۆ ئەوەی خزمەتی خەڵک و خاکی کەرکوکی پێبکەین.

هەروەها پیرۆزبایی لە بەڕێز محەمەد سەمعان پارێزگاری نوێی کەرکوک دەکەم، بە ئومێدین وەک پارێزگاری پێشوو، بەبێ جیاوازیی خزمەتی کەرکوک و دانیشتوانەکەی بکات، هەروەک سوپاسی ئەندامانی ئەنجومەنی پارێزگای کەرکوک دەکەم کە بە پەرۆشەوە بەشداربوون لە سەرخستنی ئەم پڕۆسەیە.
لە کۆتاییدا داواکارین لە خوای میهرەبان خاک و میللەتەکەمان بپارێزێت، و ئاشتی و ئۆقرەیی باڵ بەسەر پارێزگاکەماندا بکێشێت.

- سڵاو بۆ کەرکوکییە خۆڕاگرەکان
بەرەو ئارامی و ئاوەدانیی..

ئاسۆ مامەند
سەرپەرشتیاری کەرکوک-سەڵاحەدینی یەکێتیی نیشتمانیی کوردستان

PUKMEDIA