مەکتەبی راگەیاندن و هۆشیاریی: رۆژنامەگەریی بەشدارییکردنە لە بنیاتنانی کۆمەڵگە

PUKMEDIA

مەكتەبی راگەیاندن و هۆشیاری

مەکتەبی راگەیاندن و هۆشیاریی یەکێتیی نیشتمانیی کوردستان،بە بۆنەى 128 ساڵەى رۆژنامەگەرى کوردییەوە پەیامێکى بڵاوکردەوە و دواى پیرۆزبایى کردن لە سەرجەم میدیاکاران و رۆژنامەنووسانى کوردستان، رایدەگەیەنێت: لەم یادە پیرۆزەدا، پەیامی ئێمە روونە، میدیا دەبێت پارێزەری راستی بێت و لەنێوان چەواشەکاری و حەقیقەتدا، ویژدانی زیندووی کۆمەڵگە بێت، رۆژنامەگەریی تەنیا گواستنەوەی هەواڵ نییە، بەڵکو بەرگرییە لە مافەکان و بەشدارییکردنە لە بنیاتنانی کۆمەڵگەیەکی یەکسان و دادپەروەر.

دەقى پەیامەکە:

بە بۆنەی (128) ساڵەی رۆژنامەگەریی کوردییەوە

لە ساڵیادی دەرچوونی یەکەم ژمارەی رۆژنامەی «کوردستان»دا، گەرمترین پیرۆزبایی ئاراستەی هەموو رۆژنامەنووسان و میدیاکارانی کوردستان دەکەین. ئەم بۆنەیە تەنیا یادکردنەوەی رابردوو نییە، بەڵکو نوێکردنەوەی پەیمانێکە لەگەڵ راستی، ئازادی و بەرپرسیاریی نیشتمانییدا.
لە ماوەی (128) ساڵدا، رۆژنامەگەریی کوردی بە خەبات و قوربانیدان بنیات نراوە و قەڵەمە بوێرەکان هەمیشە دەنگی زوڵاڵی کۆمەڵگەکەمان بوون. ئەم مێژووە پابەندبوونمان زیاتر دەکات بە ئەرکە نیشتمانی و نەتەوایەتییەکان و بەرزکردنەوەی هۆشیاریی کۆمەڵگە.
لەم یادە پیرۆزەدا، پەیامی ئێمە روونە: میدیا دەبێت پارێزەری راستی بێت و لەنێوان چەواشەکاری و حەقیقەتدا، ویژدانی زیندووی کۆمەڵگە بێت. رۆژنامەگەریی تەنیا گواستنەوەی هەواڵ نییە، بەڵکو بەرگرییە لە مافەکان و بەشدارییکردنە لە بنیاتنانی کۆمەڵگەیەکی یەکسان و دادپەروەر.
لەم قۆناغە هەستیارەی کوردستان و عێراق و ناوچەکەدا، رۆڵی میدیا گرنگترە لە هەر کاتێک. پێویستە میدیاکان بە ئازادی و هیواوە کار بکەن بۆ پاراستنی سەقامگیری و بەهێزکردنی دیموکراسی.
ئێمە دژی هەموو جۆرێک لە توندوتیژین و هیوادارین هێزی میدیا ببێتە دەنگی ئاشتی و دیالۆگ، نەک ئامرازێک بۆ پڕوپاگەندەی جەنگ و ئاژاوە.
لە کۆتاییدا، بانگەوازی ئێمە بۆ هەموو میدیاکاران ئەوەیە:
پێنووسەکانتان بە بڕشت بێت و دەنگتان هەمیشە لەگەڵ راستی و رەوایی، ئازادی و سەقامگیریدا بێت.

مەکتەبی راگەیاندن و هۆشیاری
یەکێتیی نیشتمانیی کوردستان

PUKMEDIA