ئاماری قوربانیانی رووداوەكەی كەركوك بەرزدەبێتەوە

ميدياكان

رووداوەكەی كەركوك

رووداوێكی سەختی هاتووچۆ لەكەركوك روویدا و بەپێی ئامارە ناڕەسمیيەكانيش 6 كەس گیانیان لەدەستداوە و 23 كەسیش بریندارن.

ئێوارەی ئەمڕۆ 26ی 4ی 2026، رووداوێكی سەختی هاتووچۆ لەدەروازەی شاری كەركوك لەنێوان بارهەڵگرێك و چەند ئۆتۆمبێلێكدا روویداو بەپێی نوێترین ئاماری ناڕەسمیش، تائێستا 6 كەس گیانیان لەدەستداوە و 23 كەسی دیكەش بریندار بوون.

هەر بەهۆی رووداوەكەوە 35 ئۆتۆمبێل تێكشكاون و ماتەمینی گشتی لە شاری كەركوك راگەیەندرا.

پاش رووداوەكەش، ئاسۆ مامەند، سەرپەرشتیاری كەركوك-سەڵاحەدینی یەكێتی و رێبوار تەها، جێگری یەكەمی پارێزگاری كەركوك و ژمارەیەك لە ئەندامانی سەركردایەتی یەكێتیی نیشتمانیی كوردستان خوێنیان بەخشی بەبریندارانی رووداوەكە.

هاوكات رەوەند مەلا مەحمود لێپرسراوی مەڵبەند و ئاڤێستا شێخ محەمەد قائیمقامی ناوەندی كەركوك و ژمارەیەك لە ئەندامانی فراكسیۆنی یەكێتیی نیشتمانیی كوردستان، گەیشتنە نەخۆشخانەی ئازادی شاری كەركوك بە مەبەستی دڵنیابوون لەڕەوشی تەندروستی بریندارانی  ئەو رووداوەی ئێوارەی ئەمڕۆ لەشەقامی دەروازەی شاری كەركوك روویدا و كارەساتی لێكەوتەوە.

لەلایەكی دیكەشەوە د.هەڤاڵ ئەبوبەكر، پارێزگاری سلێمانی، هاوخەمیی بۆ رووداوەكەی كەركوك دەربڕی و ئومێدی چاكبوونەوەی خێرای بۆ بریندارەكان خواست، هاوكات هەموو ئامادەییەكی بۆ پشتیوانیی  پارێزگای كەركوك و هاووڵاتییانی خۆشەویست دووپاتكردەوە.

PUKMEDIA