بەهەوڵی فراکسیۆنی یەکێتی لە بەغداد کەرتی تەندروستی خانەقین دەبووژێنرێتەوە

PUKMEDIA

سروە محەمەد

لە چوارچێوەی هەوڵە خزمەتگوزارییەکانی فراکسیۆنی یەکێتی لە بەغداد، پڕۆژەی دروستکردنی نەخۆشخانەیەکی 100 قەڕەوێڵەیی لە خانەقین دەچێتە بواری جێبەجێکردنەوە و هاوکات چەندین کێشەی تەکنیکی و کەمیی دەرمان و ئامێری پزیشکی لە نەخۆشخانەکانی شارەکە چارەسەر دەکرێن.

سروە محەمەد، بڕیاردەری فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق بە PUKMEDIA رایگەیاند: لە چەند هەفتەی رابردوودا، رەزامەندیی وەزیری تەندروستیی عیراقم وەرگرتووە بۆ کردنەوە و بنیاتنانی نەخۆشخانەیەکی 100 قەڕەوێڵەیی بۆ شاری خانەقین.

ناوبراو ئەوەشی ئاشکرا کرد: دوای پەیوەندیکردن بە بەڕێوەبەری گشتیی تەندروستیی دیالە، بڕیاردرا و توانیمان لە ماوەی یەک رۆژدا ئامێری شۆردنی گورچیلە دابین بکەین، ئێستاش هاووڵاتییانی شاری خانەقین دەتوانن بۆ چارەسەری کێشەکانی گورچیلە لەو خزمەتگوزارییە سوودمەند بن.

ئاماژەی بەوەش کرد: لە وەزارەتی تەندروستیی عیراقەوە رەزامەندیمان وەرگرتووە کە لیژنەیەکی تایبەت سەردانی ناوچەکە بکات، بە مەبەستی کردنەوەی ئەو ئامێرە پزیشکییانەی کە کێشەی کۆدی چوونەژوورەوەیان (Username) هەیە، بەمەش بەشێکی زۆری کێشەی نەخۆشخانەکانی خانەقین چارەسەر دەکرێت.

سروە محەمەد ئەوەشی راگەیاند: هەوڵەکانمان بۆ چارەسەرکردنی کێشەکانى خانەقین بەردەوام دەبن و لەو چوارچێوەیەشدا لە چەند هەفتەى داهاتوو بە یەکجاریی کێشەی نەبوون و کەمیی دەرمان لە شاری خانەقین چارەسەردەکەین.

PUKMEDIA