وەزارەتی ناوخۆ: مامەڵە کردن بە دراوە ئەلیکترۆنییەکان قەدەغەیە

The Independent

دراوی ئەلیکترۆنی

وەزارەتی ناوخۆی هەرێمی کوردستان هۆشداری بە هاووڵاتیان دەدات کە هەموو جۆرە مامەڵەیەک لە بواری دراوە ئەلیکترۆنییەکان قەدەغەیە و دووپاتیشی دەکاتەوە، هیچ کۆمپانیایەک لە بواری دراوە ئەلیکترۆنییەکان وەک (USDT) و بازرگانیی فۆڕێکس لە هەرێمی کوردستان و عیراق مۆڵەتی رەسمییان نییە نییە.

وەزارەتی ناوخۆ لە راگەیەندراوێکیدا، ئاماژەی بەوەکردووە لەبەر ڕۆشنایی ڕێنماییەکانی بانکی ناوەندیی عیراقی فیدراڵ و وەزارەتی دارایی و ئابوریی هەرێمی کوردستان، وە بەهۆی نەبوونی چوارچێوەیەکی یاسایی کە ماف و بەرژەوەندییەکانی هاووڵاتییان بپارێزێت؛ لەبەرئەوەی هیچ کۆمپانیایەک لە بواری دراوە ئەلیکترۆنییەکان وەک (USDT) و بازرگانیی فۆڕێکس لە هەرێمی کوردستان و عیراقی فیدڕاڵ مۆڵەتی رەسمی نییە.

ئاماژە بەوەشدەکات: بەپێی یاسا و ڕێنماییە کارپێکراوەکان، هەموو جۆرە مامەڵەیەک لەم بوارانەدا قەدەغەیە، بۆیە هەر کەس و گروپێک لەژێر ناوی کۆمپانیادا لەم بوارەدا کار بکات، شوێنەکەی دادەخرێت و ڕووبەڕووی لێپرسینەوە دەبێتەوە.

 لە کۆتایشدا، وەزارەتی ناوخۆی هەرێم داوا لە هاووڵاتییان دەکات بۆ پاراستنی سەرمایەکانیان لەم جۆرە مامەڵانە دوور بکەونەوە، وە هەر کەسێک مافێکی لای ئەو لایەنانە هەیە کە پێشتر ئەم کارانەیان کردووە، با هەوڵی وەرگرتنەوەی بدات.

PUKMEDIA