25 شایەتحاڵ دژی جەلادی ئەنفال وتەیان لێوەرگیرا و دادگاییەکەش دواخرا

PUKMEDIA

عەجاج

دادگای باڵای تاوانەکان یەکەم دانیشتنی دادگاییکردنی جەلادەکەی نوگرە سەلمانی بۆ هەفتەی داهاتوو دواخست، ئەمەش دوای ئەوەی ئەمڕۆ وتەی 25 سکاڵاکار و شایەتحاڵ لە بەردەم دادوەر وەرگیرا.

ئەمڕۆ پێنجشەممە، 7ی 5ى 2026، دواى ئەوەى بە ئامادەبوونی دەیان شایەتحاڵ و کەسووکاری ئەنفالکراوان، یەکەم دانیشتنی دادگاییکردنی  (عەجاج ئەحمەد حەردان تکریتی) لە دادگای رەسافە لە بەغداد بەڕێوەچوو، دادگاییەکە بۆ 14ى5ى2026 دواخرا، بە مەبەستی تەواوکردنی رێکارە یاساییەکان و بیستنی وتەی شایەتحاڵەکانی دیکە.

لە دانیشتنەکەی ئەمڕۆدا، 25 سکاڵاکار و شایەتحاڵ چوونە بەردەم دادوەر و شاهێدیاندا و وتەکانی خۆیان لەسەر تاوانەکانی ئەو جەلادە تۆمار کرد، دوای بیستنی وتەکان، دادگا بڕیاری دواخستنى دانیشتنەکەى دا و بە پێى زانیارییەکان کۆی گشتی 221 کەس لە پارێزگاکانی سلێمانی، هەولێر، دهۆک، دیالە و سەلاحەدین وەک شایەتحاڵ بانگهێشتى دادگاییەکە کرابوون، تاوەکو لەم کەیسەدا وتەیان لێ وەربگیرێت.

تاوانبار "عەجاج ئەحمەد حەردان" یەكێك بووە لە سەرپەرشتیارانی زیندانی نوگرە سەلمان لە پارێزگای سەماوە لە باشوری عیراق و رۆژی 31ی 7ی 2025، هەواڵی دەستگیركردنی لەلایەن نوسینگەی خانمی یەكەمی پێشووى عیراقەوە راگەیەندرا و داواش لە زیندانیكراوان و كەسوكاری زیندانیكراوان و بێسەرشوێنبووەكان كرا پەیوەندیان پێوەبكەن بۆ تۆماركردنی سكاڵا دژی ئەو تاوانبارە.

PUKMEDIA