تاقیکردنەوەی کۆتایی وەرزی دووەمی پۆلە ناکۆتاکان دەستپێکرد

ئاژانسەکان

پرۆسەی تاقیکردنەوەکان

پرۆسەی ئەنجامدانی تاقیکردنەوەی کۆتایی وەرزی دووەمی پۆلە ناکۆتاکان لە هەرێمی کوردستان بەبێ کێشە و گرفت دەستیپێکرد و بۆ ئەمساڵ زیاتر لە 917 هەزار خوێندکار بەشداری تاقیکردنەوەکان دەکەن.

سەعات 8ی بەیانی ئەمڕۆ 10-5-2026 لە بەشێک لە خوێندنگاکانی هەرێمی کوردستان تاقیکردنەوەی کۆتایی وەرزی دووەمی پۆلە ناکۆتاکان دەستیپێکرد و بەپێی زانیارییەکان هەتا ئێستا هیچ گرفتێک بۆ بەڕێوەچوونی پرۆسەکە نەهاتۆتە پێش و سەرجەم ئامادەکارییەکان بۆ پرۆسەکە گیراونەتەبەر، هاوکات بەشێکی تر لە خوێندنگاکان بەپێێ کاتی دەوامی خۆیان دەست بە پرۆسەکە دەکەن.

بەپێی ئامارێکی وەزارەتی پەروەردەش، بۆ ئەمساڵی خوێندن لەهەرێمی کوردستان 917 هەزار و 158 خوێندکار بەشداری تاقیکردنەوەی پۆلە ناکۆتاکان دەکەن، کەپێک هاتووە لە پۆلەکانی 4 و 5 و 6 و 7 و 8 و 10 و 11.

پێشتریش پۆلەکانی 1 و 2 و 3ی سەرەتایی کۆتاییان بە پرۆسەی خوێندن هێناوەو دوا بەدوای تاقیکردنەوەی پۆلە ناکۆتاکان تاقیکردنەوەی پۆلی 9 دەستپێدەکات و تاقیکردنەوەی پۆلی 12 ش لە مانگی شەشدا بەڕێوەدەچێت.

بەڕێوەبەرایەتی پەروەردەی سلێمانی لەبارەی بەڕێوەچوونی پرۆسەکە ئەوەشی راگەیاندووە: چەندین رێکاری جیاواز گیراوەتە بەر بۆ رێگریکردن لە غەش و قۆپییە، وەک دانانی چاودێر و کامێرای چاودێری و دانانی ئامێری لەکارکەوتنی ئینتەرنێت، سەرجەم پێداویستییەکانیش بۆ خوێندکاران ئامادە کراوە.

PUKMEDIA