هاوردەکردنی تەماتە و شوتی قەدەغە کرا

راگەیاندنی ژووری بازرگانی و پیشەسازی سلێمانی

سەوزە و میوە

بەهۆی پێگەیشتنی بەرهەمی ناوخۆیی و لەپێناو پاڵپشتیکردنی جوتیاران، وەزارەتی کشتوکاڵی حکومەتی هەرێمی کوردستان هاوردەکردنی تەماتە و شوتی لە دەرەوە قەدەغە کرد، سەرۆکی سەندیکای عەلوەی سلێمانی-ش رایدەگەیەنێت: چاودێری نرخەکان دەکەین و لەئەگەری زۆر بەرزبوونەوەیان، داوا لە وەزارەتی کشتوکاڵ دەکەین دەرگای هاوردەکردنی ئەو دوو بەرهەمە لە وڵاتانی دەرەوە بکاتەوە.

سەروەر عەلی سەرۆکی سەندیکای عەلوەی سلێمانی بەوێبسایتی رەسمیی یەکیتیی نیشتمانیی کوردستان PUKMEDIA ی راگەیاند: بەهۆی پێگەیشتنی بەرهەمی ناوخۆیی هەموو ساڵێک لەم وەرزەدا هاوردەکردنی تەماتە و شوتی لە وڵاتانی دەرەوە بۆ هەرێم قەدەغە دەکرێت، ئەمەش لەپێناو پاڵپشتیکردنی جوتیاران و ساغکردنەوەی بەرهەمەکانیان.

راشیگەیاند: خۆشبەختانە لە ئێستادا بەرهەمی خۆماڵی گەیشتووەتە ئاستێک کە دەتوانێت پێداویستی بازاڕ پڕ بکاتەوە و جێگەی بەرهەمی دەرەکی بگرێتەوە.

سەبارەت بە بەرزبوونەوەی نرخی ئەو دوو بەرهەمەش، سەرۆکی سەندیکای عەلوەی سلێمانی ئاماژەی بەوەکرد: ناتوانین بڵێین بەهیچ جۆرێک نرخەکە بەرزنابێتەوە، چونکە لەهەندێک جێگە بەرهەمەکان پێنەگەیشتوون و رەنگە کەمییان نرخ بەرزبکاتەوە، بەڵام وەک خۆمان چاودێری نرخەکان دەکەین و لەئەگەری زۆر بەرزبوونەوەیان، داوا لە وەزارەتی کشتوکاڵ دەکەین دەرگای هاوردەکردنی ئەو دوو بەرهەمە لە وڵاتانی دەرەوە بکاتەوە.

PUKMEDIA