ترەمپ بەوەفدێكی گەورەی ملیاردێرەوە لەپەکینە

رۆژنامەی شەرقولئەوسەت

ترەمپ بەوەفدێكی گەورەی ملیاردێرانەوە گەیشتە پەکین

لە هەنگاوێكی چاوەڕواننەكراودا بۆ كەمكردنەوەی گرژییە ئابوورییەكان و چارەسەركردنی دۆسیە هەڵپەسێردراوەكان لەنێوان دوو زلهێزە ئابوورییەكەی جیهان، دۆناڵد ترەمپ، سەرۆكی ئەمریكا، بە یاوەریی وەفدێكی باڵای خاوەنكارو بەڕێوەبەرانی جێبەجێكاری (CEO) گەورە كۆمپانیاكانی ئەمریكا گەیشتە بەیجینگ. ئەم سەردانە كە چاوەڕوان دەكرێت تێیدا لوتكەیەك لەگەڵ شی جینپینگ، سەرۆكی چین ئەنجام بدرێت، وەك گۆڕانكارییەك لەنەخشەی بازرگانیی جیهانی سەیر دەكرێت.

بۆچی ترەمپ خاوەنكارانی لەگەڵدایە؟

بەپێی راپۆرتێكی رۆژنامەی شەرقولئەوسەت، ئەم سەردانە تەنها سیاسی نییە، بەڵكو "دیپلۆماسییەتی ئابووری" ئامانجی سەرەكییەتی، چاودێران پێیان وایە یاوەرییكردنی ترەمپ لەلایەن خاوەنكارانەوە، فشارێكی ڕاستەوخۆیە بۆ ئاسانكاریی كردن لەبەردەم وەبەرهێنانی ئەمریكی لە چین، ئیدارەی ترەمپ دەیەوێت لەڕێگەی ئەم وەفدەوە، چین رازیبكات كە زنجیرەی دابینكردنی پێداویستییە هەستیارەكان نەخاتە خزمەتی كێبڕكێی سیاسی و بە ئامانجی نەگرێت.

ئەو كۆمپانیایانەی لەگەڵ ترەمپ بۆ چین چوون:

لەنێو ئەو ناوانەی یاوەریی ترەمپ-یان كردووە، ڕێبەرانی كۆمپانیا زەبەلاحەكان دەبینرێن، لەوانە:
تەكنەلۆژیا و ئۆتۆمبێل: ئیلۆن ماسك (تێسلا)، تیم كووك (ئەپڵ)، كریستیانۆ ئامۆن (كواڵكۆم) و دێنا پاوڵ (مێتا).
دارایی و بانكی: لاری فینگ (بلاك ڕۆك)، دەیڤید سۆڵۆمۆن (گۆڵدمان ساكس)، و جین فریزەر (سیتی گرووپ).
پیشەسازی: كیلی ئورتبرگ (بۆینگ)، لاری كۆڵب (جەنەڕاڵ ئێلیكتریك) و جێنسن هوانگ (ئینفیدیا).

كۆمپانیاكان چییان دەوێت؟

ئامانجەكان لەچەند تەوەرێكی سەرەكیدا كۆ دەبنەوە:

1. دەستڕاگەیشتن بە بازاڕ: هەوڵدان بۆ كەمكردنەوەی بەربەستەكان لەبەردەم كۆمپانیاكانی وۆڵ ستریت و بانكی سیتی گرووپ بۆ ئەوەی بە تەواوی خاوەندارێتیی رێگەپێدانەكانیان لەچین بكەن.

2. ئاسایشی دابینكردن: دڵنیابوون لەوەی چین ڕێگری لە هەناردەكردنی كەرەستە سەرەتاییەكان، وەك "ئیندیۆم" كە بۆ پیشەسازیی شەپۆلە ڕووناكییەكان و چیپەكان پێویستە، نەكات.

3. ئاسانكاریی ڕێكخراوەیی: خێراكردنی مامەڵەی بەدەستهێنانی ڕەزامەندییەكانی حكومەتی چین بۆ پڕۆژە و گرێبەستەكان.

رێككەوتنە زەبەلاحەكان لە چاوەڕوانیدان

بەپێی زانیارییەكان، ژمارەیەك گرێبەستی گەورە لەسەر مێزی گفتوگۆكانن، لەوانە:
مێتا: چاوەڕوانی تێپەڕاندنی گرێبەستێكی دوو ملیار دۆلارییە بۆ كڕینی كۆمپانیای "مانۆس"ی چینی لەبواری زیرەكیی دەستكرد.
بلاك ڕۆك: هەوڵی كڕینی بەندەرەكان دەدات بە بەهای 23 ملیار دۆلار لە گرووپی "سی كەی هوچیسۆن".
كۆمپانیای كۆهیرێنت: لە هەوڵدایە لە ڕێگەی لوتكەكەوە ئەو سنوورداركردنانە بشكێنێت كە بەیجینگ لەسەر هەناردەكردنی ماددە سەرەتاییەكان دای ناوە.

ئەم سەردانە وەك هەوڵێكی گەورە سەیر دەكرێت بۆ ئەوەی بازاڕی چین بكرێتەوە، بەڵام پرسیارەكە ئەوەیە، ئایا بەیجینگ ئامادەیە قوربانی بە بەرژەوەندییە ستراتیژییەكانی خۆی بدات لەپێناو رازیبوونی كۆمپانیا ئەمریكییەكان؟


 PUKMEDIA