مەكتەبی سیاسی: سزادانی عەجاج وانەیەكی گەورەیە بۆ دوژمنانی كوردستان

PUKMEDIA

یەكێتیی نیشتمانیی كوردستان

مەكتەبی سیاسی، یەكێتیی نیشتمانیی كوردستان، بەبۆنەی دەركردنی بڕیاری لەسێدارەدان بۆ عەجاج، جەلادی جینۆسایدی ئەنفال و تاوانباری كوردكوژی زیندانی نوگرە سەلمان، بروسكەیەكی پیرۆزبایی ئاڕاستەی كۆمەڵانی خەڵكی كوردستان بەگشتی و كەسوكاری ئەنفالكراوان بەتایبەت دەكات، كە ئەمە دەقەكەیەتی:

مەكتەبی سیاسی یەكێتیی نیشتمانیی كوردستان پیرۆزبایی گەرم لە كۆمەڵانی خەڵكی كوردستان بەگشتی و كەسوكاری ئەنفالكراوان بەتایبەتی دەكات بە بۆنەی دادگاییكردن و بڕیاری حوكمدانی رەوا بەسەر جەلادی گەورەی  جینۆسایدی ئەنفال و تاوانباری كوردكوژی زیندانی نوگرە سەلمان، (عەجاج)ی خوێنڕێژدا.

ئەمڕۆ پێنج شەممە  14ی 5ی 2026،  دادگای رەسافە لە بەغداد گۆڕەپانی تۆڵەی رەوای مێژوو و حوكمی دادپەروەرانەبوو بەسەر تاوانبار عەجاج ئەحمەد حەردان تكریتی كە لەدۆسێی ئەنفالدا ناوی وەك بەدناوترین بەدناوەكانی رژێمی بەعس دێت، تاوانبارێك كە قێزەونترین جۆر تاوانی رۆژانە و سات بە ساتی بەرامبەر خوشك و دایك و پیرو منداڵانی زیندانی نوگرە سەلمان ئەنجامداوەو دێوەزمەیەكی سەرباری رژێمی دێوەزمەی بەعس بوو لە دژی گەلەكەمان.

دادگاییكردنی عەجاج دەرس و وانەیەكی گەورەیە بۆ هەموو دوژمن و نەیارانی گەلی كوردستان، كە درەنگ یان زوو، رۆژی سزادانی تاوانباریان دێت و رۆژی ئینساف و پێدانەوەی ماف بە زۆرلێكراوان، لەهەموو چین و توێژەكانی میللەتەكەمان، دێت و هەرگیز بەسەریانەوە ناچێت.

سەركەوێ دادو دادپەروەری لەعیراقی نوێ و فیدراڵداو بێتەدی هەموو ئاواتەكانی گەل كە هەزاران قوربانی لە پێناودا دراوە.

رۆحی شەهیدان ئاسوودە بێت و دووبارە پیرۆزە لەیادگاری شیرینی ئەنفالكراوەكان.

مەكتەبی سیاسی
یەكێتیی نیشتمانیی كوردستان

PUKMEDIA