ئه‌مریكا و ئێران مه‌رجی قورسیان بۆ كۆتاییهێنانی جه‌نگ هه‌یه‌

الایام

ئاڵای ئەمریکا و ئێران

بۆ كۆتایی هاتنی هه‌میشه‌یی جه‌نگ و به‌ره‌و پێشچوونی دانوستانه‌كان، ئه‌مریكا 5 مه‌رجی سه‌ره‌كی و ئێرانیش 10 مه‌رجی هه‌یه‌، كه‌ به‌شێكیان هێڵی سوورن، به‌ڵام ئه‌مریكا به‌ ته‌واوی مه‌رجه‌كانی ئێران ره‌تده‌كاته‌وه‌.

ئاژانسی هه‌واڵی "فارس"ی ئێرانی، پێنج مه‌رجی سه‌ره‌كی ئاشكرا كرد كه‌ ئه‌مریكا له‌ وه‌ڵامه‌كه‌یدا بۆ پێشنیازی ڕ‌ێككه‌وتن له‌گه‌ڵ ئێران دایناون، كه‌ واشنتۆن مه‌رجی داناوه‌ هیچ قه‌ره‌بوویه‌ك به‌ ئێران نه‌درێت، هاوكات له‌گه‌ڵ راده‌ستكردنی نزیكه‌ی 400 كیلۆگرام له‌ یۆرانیۆمی پیتێندراوی ئێران به‌ ویلایه‌ته‌ یه‌كگرتووه‌كانی ئه‌مریكا.

هه‌روه‌ها هێشتنه‌وه‌ی كاركردنی ته‌نها یه‌ك كۆمه‌ڵه‌ له‌ دامه‌زراوه‌ ئه‌تۆمییه‌كانی ئێران، هه‌روه‌ها نه‌دانی ته‌نانه‌ت 25% ی داراییه‌ بلۆككراوه‌كانی ئێران، دوو مه‌رجی دیكه‌ی ئه‌مریكان.

ئاژانسه‌كه‌ ئاماژه‌ی به‌وه‌شكردووه‌، واشنتۆن مه‌رجی ئه‌وه‌شی داناوه‌ كه‌ راگرتنی شه‌ڕ‌ له‌ سه‌رجه‌م به‌ره‌كاندا ببه‌سترێته‌وه‌ به‌ ره‌وتی دانوستانه‌ به‌رده‌وامه‌كانه‌وه‌، ئه‌مه‌ش وه‌ك یه‌كێك له‌هه‌ستیارترین به‌نده‌كانی ناو پێشنیازه‌كه‌ی ئه‌مریكا لێی ده‌ڕوانرێت.

له‌لایه‌كی دیكه‌وه‌، محه‌مه‌د ساڵح جۆكار، سه‌رۆكی كۆمسیۆنی كاروباری ناوخۆ لە پەرلەمانی ئێران رایگه‌یاندوه‌: له‌م ماوه‌یه‌دا پێشنیازی زۆر له‌ لایه‌ن ئه‌مریكاوه‌ خراوه‌ته‌ڕ‌وو، به‌ڵام  ئێران له‌ وه‌ڵامدا جه‌ختی له‌ مه‌رجه‌كانی پێشووی خۆی كردووه‌ته‌وه‌ و 10 مه‌رجه‌كه‌ی ڕ‌ێبه‌ری وه‌ك هێڵی سوور داناوه‌ بۆ هه‌ر دانوستانێك.

مه‌رجه‌كانی ئێران، خۆی له‌كۆنترۆڵكردن و ئیداره‌دانی گه‌رووی هورمز به‌ هه‌ماهه‌نگیی هێزه‌ چه‌كداره‌كانی ئێران، كۆتایی هاتنی جه‌نگ له‌ هه‌موو به‌ره‌كانه‌وه‌ ده‌بینێته‌وه‌، له‌گه‌ڵ ده‌رچوونی هه‌موو هێزه‌كانی ئه‌مریكا له‌ ناوچه‌كه‌و قه‌ره‌بووكردنه‌وه‌ی هه‌موو زیانه‌كانی جه‌نگ، ئه‌مه‌ جگه‌ له‌هه‌ڵگرتنی ته‌واوی سزاكانی سه‌ر تاران و پێدانی مافی پیتاندنی یۆرانیۆم و ئازادكردنی ته‌واوی پاره‌ بلۆككراوه‌كانی ئێران له‌ وڵاتانی ده‌ره‌وه‌.

هه‌رچه‌نده‌ جۆكار، باسی له‌ سێ خاڵه‌كی دیكه‌ی مه‌رجه‌كانی ڕ‌ێبه‌ری وڵاته‌كه‌ی بۆ دانوستانه‌كان نه‌كردووه‌، به‌ڵام پێشتر لێپرسراوانی ئێران باسیان له‌ گره‌نتی دووباره‌ نه‌بوونه‌وه‌ی جه‌نگ و پاراستنی به‌رنامه‌ مووشه‌كییه‌كه‌ی و وه‌رگرتنی ڕ‌سومات له‌و كه‌شتییانه‌ی به‌ گه‌رووی هوورمزدا تێده‌په‌رن كردبوو، كه‌ ئه‌و مه‌رجانه‌ به‌هێڵی سووری ڕ‌ێبه‌ر له‌ دانوستانه‌كان داده‌نرێت.

PUKMEDIA