شێخ جەعفەر: دواکەوتنی پێکهێنانی حکومەت لەبەرژەوەندی هیچ لایەنێک نییە

PUKMEDIA

شێخ جەعفەر و رێباز بێرکوتی

ئەمڕۆ دووشەممە شێخ جەعفەر شێخ مستەفا، لێپرسراوی ئەنجومەنی پاراستنی بەرژەوەندییە باڵاکانی یەکێتیی نیشتمانیی کوردستان سەردانی مەڵبەندی 3ی یەکێتیی نیشتمانیی کوردستانی کرد و لە لایەن ڕێباز بێرکۆتی، لێپرسراوی مەڵبەند و جێگران و کارگێڕان و کادیرانی مەڵبەندەوە بە گەرمی پێشوازی لێکرا.

لە کۆبونەوەیەکدا،  شێخ جەعفەر شێخ مستەفا سوپاسی لێپرسراو و گشت کادیرانی مەڵبەندی 3ی یەکێتیی نیشتمانیی کوردستانی کرد لە بەرانبەر راپەڕاندنی ئەرکەکانیان و خزمەتکردنی چین و توێژەکانی شاری هەولێر بە بێ جیاوازی، لەم سۆنگەیەوە هەموو پاڵپشتییەکی خۆی بۆ بەرەوپێشچوونی کاروبارەکانیان دووپات کردەوە، دواتر تیشکی خستەسەر مێژوو و خەباتی پڕ لە تێکۆشانی یەکێتی و قۆناغی ئێستای نێو پڕۆسەی حوکمڕانیی و بەرنامە و کاری نوێی حزبی شەهیدان بۆ خزمەتکردنی کۆمەڵانی خەڵکی کوردستان.

لە تەوەرێکی تری کۆبوونەوەکەدا، شێخ جەعفەر شێخ مستەفا جەختی لە گرنگیی یەکڕیزی نێوان لایەنە سیاسییەکانی کوردستان کردەوە، لەپێناو پاراستنی ئاسایش و سەقامگیری هەرێمی کوردستان، هەروەها هیوای خواست بە هەوڵ و تێکۆشانی کۆی لایەنەکان و یەکخستنی بۆچوونەکان، کابینەی نوێی حکومەتی هەرێمی کوردستان بە خێرایی پێکبهێنرێت، چونکە دواکەوتنی پێکهێنانی حکومەت لە بەرژەوەندی هیچ کەس و لایەنێکدا نییە، ئامادەیی یەکێتیی نیشتمانیی کوردستانیشی بۆ ئەم پرسە وەک فاکتەرێکی بەهێز نیشاندا.

PUKMEDIA