بە تۆمەتی باج و سەرانە سەندن لە بەرپرسان تۆمەتبارێک لە نەجەف دەستگیرکرا

پەڕەی سەرەکی ئەنجومەنی باڵای دادوەری

ئەنجومەنی باڵای دادوەری

دادگای لێکۆڵینەوەی نەجەف دەستگیرکردنی تۆمەتبارێکی ڕاگەیاند، کە بە ناوی نووسینگەی سەرۆکی ئەنجومەنی باڵای دادوەری و لێژنەی دژە گەندەڵییەوە باج و سەرانەی لە بەرپرسانی پارێزگاکە وەرگرتووە.

ئەمڕۆ دووشەممە 27ی7ی2026، ئەنجومەنی باڵای دادوەری لە راگەیەنراوێکدا ئاماژەی بەوەکرد، دادگای لێکۆڵینەوەی نەجەف دەستگیرکردنی تۆمەتبارێکی راگەیاند کە بە مەبەستی بڕینەوەی پارە و سەرانەسەندنی دارایی (سەپاندنی باج و هەڕەشە) لە بەڕێوەبەری تۆمارکردنی خانووبەرەی پارێزگای نەجەف، خۆی وەک فەرمانبەری نووسینگەی سەرۆکی ئەنجومەنی باڵای دادوەری و لێژنەی ناوەندیی دژە گەندەڵی لە سەرۆکایەتی وەزیران ناساندبوو.

راشیگەیاندووە: تۆمەتبارەکە بە تەلەفۆن پەیوەندی بە بەڕێوەبەری تۆمارکردنی خانووبەرەوە کردووە و بانگەشەی ئەوەی کردووە، کە لە کۆبوونەوەدایە لەگەڵ سەرۆکی ئەنجومەنی باڵای دادوەری بە مەبەستی ئیمزاکردنی بڕیارنامەکان و ناوی بەڕێوەبەری تۆمارکردنی خانوبەرە لەناو لیستی فەرمانی دەستگیرکردندایە، هەروەها دەتوانێت ئەو رێکارانە لەبەرانبەر بڕێک پارەدا هەڵبوەشێنێتەوە و روونیشیکردووەتەوە: تۆمەتبارەکە پێشتریش سەرانەی لە بەڕێوەبەری فرۆکەخانەی نەجەفی ئەشرەف و بەڕێوەبەری دابەشکردنی کارەبای پارێزگاکەش سەندووە.

لەئێستاشدا دادگا رێکارە یاساییە پێویستەکانی گرتووەتە بەر و بەڵگەکانی کۆکردووەتەوە و توانیویەتی تۆمەتبارەکە دەستگیر بکات، هەروەها وتەکانی بە شێوەی دادوەری تۆمار کراون بە مەبەستی رەوانەکردنی بۆ دادگای تایبەتمەند تاوەکو بەپێی یاسا دادگایی بکرێت.

PUKMEDIA