بەناردنی لیستی مووچە و داهات بەغداد پێش جەژن مووچە دەنێرێت

PUKMEDIA

پارەی 50 هەزار دیناری عیراقی

وەزارەتی دارایی عیراق دەستبەدابەشکردنی مووچەی مانگی ئایاری مووچەخۆرانی خۆی دەکات و ئەگەر لەماوەی چەند رۆژی داهاتوودا وەزارەتی دارایی هەرێم بتوانێت، لیستی مووچە و داهاتی نانەوتی بۆ عیراق بنێرێت، پێش جەژنی قوربان مووچەی مانگی ئایار لە عیراقەوە بۆ هەرێم دەنێردرێت.

سەرچاوەیەک لە وەزارەتی دارایی عیراق بە PUKMEDIA ی راگەیاند: بە بڕیاری وەزیری دارایی لە سبەینێ سێشەممە 19-5-2026ەوە دەستدەکرێت بە دابەشكردنی مووچەی مانگی ئایاری مووچەخۆرانی عیراق و چاوەڕوانیش دەکرێت، پێش جەژن مووچەی سەرجەم وەزارەت و دەستە و هێزە ئەمنییەکان دابەشبکرێت.

لەبارەی ناردنی مووچەی مانگی ئایاری مووچەخۆرانی هەرێمیش ئەندامێکی ئەنجومەنی نوێنەرانی عیراق بە PUKMEDIA ی راگەیاند: ئەگەر تا کۆتایی ئەم هەفتەیە وەزارەتی دارایی هەرێم تەرازوی پێداچونەوەی مانگی نیسان و لیستی مووچەی مانگی ئایاری مووچەخۆران و داهاتی نانەوتی مانگی ئایار بۆ عیراق بنێرێت، چاوەڕواندەکرێت لە هەفتەی داهاتوودا وەزارەتی دارایی عیراق مووچە بۆ هەرێم بنێرێت.

ئەو ئەندامەی ئەنجومەنی نوێنەرانی عیراق ئەوەشی نەشاردەوە کە، ئەگەری ناردنی مووچەی مانگی ئایار لەلایەن عیراقەوە پێش جەژن، ئەگەرێکی لاوازە، بەڵام راشیگەیاند: ئەگەر وەزارەتی دارایی هەرێم پابەندییەکانی خۆی بە زووی جێبەجێ بکات، نوێنەرانی کورد لەبەغداد فشارەکان دەستپێدەکەین بۆ ناردنی مووچە پێش جەژنی قوربان.

ئەمەش لەکاتێکدایە رۆژی شەممە 16-5-2026 دابەشکردنی مووچەی مانگی نیسان لەلایەن وەزارەتی دارایی هەرێمەوە کۆتایی پێهات و لەماوەی سێ رۆژدا سەرجەم مووچەخۆرانی هەرێم مووچەی مانگی نیسانیان وەرگرت.

PUKMEDIA