مەكتەبی سكرتارییەت: ئەحمەد عەبدوڵڵا پێشمەرگەو خەباتكاری سەرڕاستی شۆڕشی نوێ بوو

راگەیاندنی مەكتەبی سكرتارییەت

سەردانی وەفدی مەكتەبی سكرتارییەت بۆلای هەڤاڵ ئەحمەد عەبدوڵڵا ئەحمەد

رۆژی 18ـی 5ـی2026 ئەندامانی وەفدی مەكتەبی سكرتارییەتی سەرۆك مام جەلال، لەشاری سلێمانی پێشمەرگەو تێكۆشەری دێرین هەڤاڵ ئەحمەد عەبدوڵڵا ئەحمەد یان بەسەركردەوە.

لەو بەسەركردنەوەیەدا، ئەندامانی وەفدی مەكتەبی سكرتارییەت لەنزیكەوە لەبارودۆخی تەندروستی و ژیان و گوزەرانی هەڤاڵ ئەحمەد عەبدوڵڵا یان پرسییەوە كە لەڕابردوودا بەشێك بووە لە كۆڕی خەبات و تێكۆشانی كوردایەتی.

هاوكات ئەندامانی وەفدی مەكتەبی سكرتارییەتی سەرۆك مام جەلال پێزانینیان دەربڕی بۆ رابردووی پاك و سەربەرزانەی هەڤاڵ ئەحمەد وەك پێشمەرگەیەكی خۆنەویست و خەباتكارێكی بەورە و سەر راستی شۆڕشی نوێ كە هەر لەسەرەتاوە چەكی شەرەف و كوردایەتی لە شان نابوو بووبووە بەشێك لە سەركەوتنەكانی خەباتی چەكداری شۆڕشی نوێی گەلی كورد، لەبەرامبەر ئەو رابردووە پڕ لە شكۆیەشدا چەپكە گوڵی رێز و وەفای سەرۆك بافڵ و قوباد تاڵەبانی ـییان پێشكەشكرد . 

لەوتەیەكدا هەڤاڵ ئەحمەد عەبدوڵڵا وێڕای سوپاسكردنی بەسەركردنەوەكەی روونی كردەوە سەركەوتنی شۆڕشی نوێ ئەو سیاسەتە حەكیمانەی سەرۆك مام جەلال بوو وەك سەركردەیەكی گەورە و كاریزمی گەلی كورد كە دەیزانی چۆن لە هەموو قۆناغەكاندا خاڵ بخاتە سەر پیتەكانی سیاسەتكردن .

PUKMEDIA