د.ئارام محەمەد: زیاتر لە چوار هەزار هەلی کار بۆ دەرچووان رەخسێندراوە

وەزارەتى خوێندنى باڵا

وێنەیەکى سەردانەکە

د.ئارام محەمەد وەزیری خوێندنی باڵا رایگەیاند: لە ماوەى سێ ساڵدا چوار هەزار و 100 هەلی کار لە رێگەی زانکۆ حکومییەکانی کوردستان بۆ دەرچووان رەخسێندراون.

ئەمڕۆ پێنج شەممە 21ى5ى2026 د.ئارام محەمەد وەزیرى خوێندنى باڵا و توێژینەوەى زانستى رایگەیاند: لە ماوەى سێ ساڵى رابردوودا لە رێگەی سەنتەرەکانی پەرەپێدانی کار لە زانکۆکانی کوردستان چوار هەزار و 100 دەرچووی زانکۆ و پەیمانگا دەرفەتی کارکردنیان لە کەرتی تایبەت بۆ رەخسێندراوە.

وەزیری خوێندنی باڵا و توێژینەوەی زانستی روونیشى کردەوە: ئەرکی زانکۆ پۆلیتەکنیکییەکان بریتیە لە پێگەیاندنی کادری تەکنیکی و پیشەیی بۆ بازاڕی کاری کوردستان و بەستنەوەی ناوەڕۆکی پرۆگرامەکانی خوێندن بە بازاڕی کار.

ئەمەش لە کاتێکدایە د.ئارام محەمەد وەزیرى خوێندنى باڵا و توێژینەوەى زانستى ئەمڕۆ سەردانی زانکۆی پۆلیتەکنیکی دهۆکی کرد و لەگەڵ ئەنجومەنی زانکۆی پۆلیتەکنیکی دهۆک کۆبوەوە و ئەم ئامارەش کە سەبارەت بە هەلى کار بوو بۆ دەرچووانى زانکۆ و پەیمانگاکانى سەرتاسەرى هەرێمى کوردستان خستەڕوو، هاوکات پشتیوانی خۆى بۆ پرۆژەکانی زانکۆ و چارەسەرکردنی کێشە و گرفتەکان دووپات کردەوە.

هەلى کارەکانیش بەم شێوەیەى خوارەوەن:

لەساڵی 2023 دا 911 هەلی کار رەخسێندراوە.
لەساڵی 2024 دا 1288 هەلی کار رەخسێندراوە.
لە ساڵی 2025 دا 1901 هەلی کار رەخسێندراوە.

PUKMEDIA