نزیکەى هەزار خێزان لە ئاوارەکانى عەفرین بۆ زێدى خۆیان گەڕانەوە

ANHA

وێنەیەکى کاروانەکە

ئەمڕۆ کاروانێکى دیکەى ئاوارەکانى عەفرین کە نزیکەى هەزار خێزان بوون گەڕانەوە بۆ زێدى خۆیان و کاروانى دیکەش سەرقاڵى ئامادەکارین بۆ گەڕانەوە.

بەرەبەیانی ئەمڕۆ پێنج شەممە 21ی ئایاری 2026، کاروانێکی نوێ کە نزیکەی هەزار خێزانی ئاوارەبووى خەڵکی عەفرین بوون، کە لە شارەکانی قامیشلۆ، عامودا و دێریک لە رۆژئاوای کوردستان نیشتەجێ بوون، بەرەو زێدی خۆیان بەڕێکەوتن.

ئەم خێزانانە چەند رۆژێک پێشتر دەستیان بە ئامادەکاری بۆ گەڕانەوەیان کردبوو و رۆژی پێشتر لە یاریگای 12ی ئازار لە قامیشلۆ کۆبونەوە و دەستیان بە گەشتەکەیان کرد بۆ گەڕانەوە بۆعەفرینى زێدى خۆیان.

ئەم گەڕانەوەیە بۆ عەفرین لە چوارچێوەی رێککەوتنی 29ی کانوونی دووەمی نێوان هێزەکانی سوریای دیموکرات و حکومەتی کاتی سوریا دێت، کە ئامانجی ئاسانکردنی گەڕانەوەی ئاوارەکانی عەفرین بۆ ماڵ و زەوییەکانیانە.

ئەمە شەشەمین کاروانە کە لە جزیرە و کۆبانێوە دەگەڕێنەوە، هاوکات کاروانى دیکە کە لە هەزاران کەس پێکهاتوون ئامادەکاری دەکەن بۆ گەڕانەوە لە ماوەی داهاتوودا.

PUKMEDIA