پێش جەژن مووچەخۆرانی هەرێم مووچە وەردەگرن

PUKMEDIA

دراوی عیراقی

وەزیری دارایی عیراق ئیمزای لەسەر خەرجكردنی مووچەی مانگی ئایاری مووچەخۆرانی هەرێم كردو وەزیری دارایی هەرێمیش دەڵێت دوای جەژنی قوربان داهاتی نانەوتی مانگی ئایار بۆ عیراق دەنێرین.

بەپێی زانیارییەكانی PUKMEDIA، كەمێك پێش ئێستا فالح ساری،  وەزیری دارایی عیراق، ئیمزای لەسەر خەرجكردنی مووچەی مانگی ئایاری مووچەخۆرانی هەرێم كردو چاوەڕواندەكرێت سبەینێ دوو شەممە 25ی 5ی 2026، پارەی مووچە بخرێتە سەر هەژماری دارایی هەرێم و هەمان رۆژیش لیستی دابەشكردنی مووچەی ئەم مانگە بڵاو بكرێتەوە.

هاوكات سەرچاوەیەك لەوەزارەتی دارایی هەرێم بە PUKMEDIA ی راگەیاند: لەگەڵ گەیشتنی مووچە، وەزارەتمان دەست بەدابەشكردنی مووچە دەكات و لەڕۆژانی جەژنیشدا دابەشكردنی مووچە بەردەوامی دەبێت.

هاوكات هەرچەندە ناردنی مووچە پەیوەستە بەچوار مەرجی سەرەكی كەخۆیان لەناردنی لیستی مووچە، تەرازوی پێداچوونەوە، ناردنی نووسراوی وەزارەتی نەوت بۆ دارایی عیراق و ناردنی داهاتی نانەوتی، بەڵام جگە لەناردنی لیستی مووچەو تەرازوی پێداچونەوە، جێبەجێ نەكردنی دوو مەرجەكەی دیكە نابنە رێگر لەبەردەم ناردنی مووچەی مانگی ئایار.

 ئەمەش لەكاتێكدایە، ئاوات جەناب نوری، وەزیری دارایی حكومەتی هەرێمی كوردستان رایگەیاندبوو: لەپاش كۆتایی هاتنی مانگی ئایار داهاتی نانەوتی بۆ عیراق دەنێرین، بەڵام دواكەوتنی داهات نابێتە هۆكار بۆ دواخستنی مووچە.

جێی وەبیرهێنانەوەیە، هەفتەی رابردوو سروە عەبدولواحید، وەزیری ژینگەی عیراق، یەكەم كەس بوو كەمژدەی خەرجكردنی مووچەی مانگی ئایاری مووچەخۆرانی هەرێمی لەلایەن عیراقەوە راگەیاندو ئاماژەی  بەوەدا، سەرۆكوەزیرانی عیراق بەڵێنی پێداوە پێش هاتنی جەژنی قوربان مووچەی مووچەخۆرانی هەرێم بنێرێت.

لەلایەكی دیكەشەوە، عەلی زەیدی، سەرۆكوەزیرانی عیراق بەڵێنیداوە بۆ مانگەكانی داهاتووش هاوشێوەی مووچەخۆرانی عیراق، مووچەخۆرانی هەرێمیش مووچەیان پێبدرێت و دوانەكەوێت.

PUKMEDIA