محه‌مه‌د باقر قالیباف به‌زۆرینه‌ی ده‌نگ به‌سه‌رۆكی په‌رله‌مانی ئێران هه‌ڵبژێردرایه‌وه‌

arabic.euronews

محه‌ممه‌د باقر قالیباف سه‌رۆكی په‌رله‌مانی ئێران

محه‌مه‌د باقر قالیباف، سه‌رۆكی په‌رله‌مانی ئێران به‌ده‌نگی زۆرینه‌ی په‌رله‌مانتاران، بۆ سێیه‌م ساڵ له‌سه‌ر یه‌ك به‌ سه‌رۆكی په‌رله‌مانی ئێران هه‌ڵبژێردرایه‌وه‌.

ئاژانسی هه‌واڵی فارس بڵاویكرده‌وه‌، به‌ره‌به‌یانی ئه‌مڕ‌ۆ دووشه‌ممه‌، 25ی ئایاری 2026، هه‌ڵبژاردنی ده‌سته‌ی سه‌رۆكایه‌تیی ئه‌نجوومه‌نی شورای ئیسلامی ئێران (په‌رله‌مان) به‌ڕ‌ێوه‌چوو، له‌م هه‌ڵبژاردنه‌دا محه‌مه‌د باقر قالیباف بۆ سێیه‌م ساڵ له‌سه‌ر یه‌ك وه‌ك سه‌رۆكی 12ـه‌مین خولی په‌رله‌مان دیاریی كرا.

به‌ گوێره‌ی ئاژانسی فارس، هه‌موو ساڵێك له ‌حه‌فته‌م رۆژی مانگی خوردادی هه‌تاوی، ساڵڕ‌ۆژی دامه‌زراندنی په‌رله‌مانی ئێرانه ‌و به‌م بۆنه‌یه‌وه‌ هه‌ڵبژاردن بۆ سه‌رۆكایه‌تی و لیژنه‌ تایبه‌تمه‌نده‌كانی په‌رله‌مان به‌ڕ‌ێوه‌ده‌چێت، ده‌سته‌ی سه‌رۆكایه‌تی له‌ 11 ئه‌ندام و یه‌ك سه‌رۆك، دوو جێگر، سێ چاودێر و شه‌ش سكرتێر پێكدێت.

هه‌روه‌ها په‌رله‌مانی ئێران 13 لیژنه‌ی تایبه‌تمه‌ندی هه‌یه‌، هه‌ر یه‌كێك له‌ لیژنه‌كان شه‌ش ئه‌ندام له‌خۆده‌گرێت، یه‌كێك سه‌رۆكایه‌تی لیژنه‌كه‌ ده‌كات و دووانی دیكه‌ جێگری سه‌رۆكی لیژنه‌كه‌ ده‌بن، هاوكات وته‌بێژێك و دوو سكرتێری ده‌بێت.

ئه‌ندامانی سه‌رۆكایه‌تی په‌رله‌مانی ئێران به‌ ده‌نگدانی راسته‌وخۆی سه‌رجه‌م په‌رله‌مانتاران هه‌ڵده‌بژێردرێن، به‌ڵام سه‌رۆكایه‌تی لیژنه‌ تایبه‌تمه‌نده‌كانی په‌رله‌مان له‌لایه‌ن ئه‌ندامانی خودی لیژنه‌كان بۆ ماوه‌ی یه‌ك ساڵ هه‌ڵده‌بژێردرێن.

PUKMEDIA