سەدر: سەرایا سەلام پەیوەندی بە رەوتەکەمانەوە نەماوە

میدیاکان

موقتەدا سەدر رێبه‌ری ره‌وتی نیشتمانیی شیعە

موقتەدا سەدر رێبه‌ری ره‌وتی نیشتمانیی شیعە، جیابوونه‌وه‌ و هه‌ڵوه‌شاندنه‌وه‌ی ته‌واوه‌تی هێزە چەکدارەکانی"سه‌رایا سه‌لام"ی له‌ ره‌وته‌كه‌ی ڕاگه‌یاند و دووپاتی کردەوە :ئه‌م هه‌نگاوه‌ له‌ پێناو به‌رژه‌وه‌ندیی گشتیی نیشتمان و بۆ دوورخستنه‌وه‌ی ئه‌و مه‌ترسییانه‌یه‌ كه‌ روبه‌ڕووی وڵات ده‌بنه‌وه‌.

سه‌در لە راگەیەندراوەندراوێکیدا كه‌ له‌ پلاتفۆڕمی  خۆی لە ئێکس بڵاویكردووه‌ته‌وه‌،ئاماژەی بەوەکردووە: کە بڕیار دراوه‌ ته‌واوی لایه‌نه‌ مه‌ده‌نییه‌كانی سه‌ر به‌ "سه‌رایا سه‌لام" بگوازرێنه‌وه‌ بۆ ناو پرۆژه‌ی (البنيان المرصوص)، به‌ مه‌رجێک هیچ جۆره‌ باره‌گا، چه‌ك، پۆشاكی تایبەتی سه‌ربازی یان ناونیشانێكی جیاوازیان نه‌مێنێت.

دەشڵێت: ئه‌م هه‌نگاوه‌ له‌ پێناو به‌رژه‌وه‌ندیی گشتیی نیشتمان و بۆ دوورخستنه‌وه‌ی ئه‌و مه‌ترسییانه‌یه‌ كه‌ روبه‌ڕووی وڵات ده‌بنه‌وه‌، به‌ جۆرێک كه‌ ئه‌م هێزه‌ سه‌ربازییه‌ به‌ ته‌واوه‌تی ده‌خرێته‌ سه‌ر ده‌وڵه‌ت و ئه‌و لایه‌نه‌ رەسمیانەی كه‌ به‌رپرسن لە رێکخستنە سه‌ربازییه‌كان.

 سه‌در سوپاسی هه‌وڵی هێزه‌ سه‌ربازییه‌كانی سه‌رایا سه‌لامی كردووه‌ و هیوای خواستووه‌ لێخۆشبوون هه‌بێت بۆ هه‌ر كه‌سێک كه‌ نه‌یتوانیوه‌ خۆی له‌گه‌ڵ دیدگا ئاینی، عه‌قیدی و كۆمه‌ڵایه‌تییه‌كانی ئه‌واندا بگونجێنێت.

له‌ كۆتایی راگه‌یه‌ندراوه‌كه‌یدا، موقته‌دا سه‌در هیوای خواستووه‌ كه‌ ته‌واوی پێكهاته‌كانی حه‌شدی شەعبی خۆیان له‌ فه‌رمان و هه‌ژموونی حزبی و تائیفی داببڕن، بۆ ئه‌وه‌ی سه‌روه‌ریی یاسا بچه‌سپێت.

ئەمەش لەکاتێکدایە، عەلی زەیدی سەرۆکوەزیرانی عیراق، هەوڵەکانی چڕکردووەتەوە، بۆ ئەوەی چەک تەنها لە دەستی دەوڵەتدا بێت و هیچ گروپێکی چەکدار نەمێنێت، بۆ ئەمەش چەند گروپێک ئامادەیی خۆیان بۆ رادەستکردنی چەکەکانیان دەربڕیوە و تەنها دوو گروپ ئامادەییان دەرنەبڕیوە

PUKMEDIA