عیراق بۆ چوارەمین جار یەکەمی خەڵاتی حەج و عومرەیە

راگەیاندنى حەج و عومرەی عیراق

لۆگۆى حەج و عومرەی عیراق

دەستەی رەسمی حەج و عومرەی عیراق رایگەیاند: بۆ چوارەمین ساڵی یەک لەدوای یەک عیراق خەڵاتی باشترین وەفدی حەج لەسەر ئاستی جیهانی ئیسلامی بەدەستهێناوە، ئەمەش دەستکەوتێکی گرنگە لە بەڕێوەبردنی یەکێک لە گرنگترین دۆسیە ئایینیەکانی ناوچەکە.

ئاماژە بەوەشدا: ئەم سەرکەوتنە بەهۆى شایستەیی و لێهاتووییەوە بووە، کە دوای کێبڕکێیەکی بەهێز لەگەڵ وەفدی وڵاتانی دیکەی ئیسلامی لە وەرزی حەجی ئەمساڵدا بەدەستهاتووە.

ئەم خەڵاتە ساڵانە لەلایەن وەزارەتی حەج و عومرەی شانشینی عەرەبستانی سعوودیەوە دەبەخشرێت، پشت بە پێوەری توندوتۆڵ دەبەستێت لە هەڵسەنگاندنی کوالیتی خزمەتگوزارییەکانی نیشتەجێکردن، گواستنەوە، پابەندبوون بە رێنماییە ئەمنییەکان و بەکارهێنانی تەکنەلۆژیای دیجیتاڵی بۆ ئاسانکاری کاروباری حاجیان.

چاودێران پێیان وایە کە پاراستنی ئەم پێگەیە بۆ ماوەی چوار ساڵ، نیشانەی گەشەکردنی توانای دامەزراوەیی و کارگێڕییە لە عیراقدا بۆ بەڕێوەبردنی دۆسیە مرۆیی و لۆجیستییە گەورەکان، کە رەنگدانەوەی ئەرێنیشی لەسەر پێگەی ناوچەیی وڵاتەکە دەبێت.

PUKMEDIA