مەڵبەندی 24ی راپەڕین زیاتر لە 5 هەزار خانەوادەی سەربەرزی شەهیدانی بەسەرکردەوە

راگەیاندنى مەڵبەندی 24ی راپەڕین

وێنەى یەکێک لە سەردانەکان

وەک نیشاندانی وەفاداریی نەگۆڕی یەکێتیی نیشتمانیی کوردستان بۆ رێبازی پیرۆزی شەهیدان و رێزگرتن لە خەبات و قوربانیدانی خانەوادە سەربەرزەکانیان، لە رۆژانی جەژنی پیرۆزی قورباندا کەمپەینێکی فراوانی جەژنەپیرۆزە و بەسەرکردنەوە لە سنووری مەڵبەندی 24ی راپەڕین بەڕێوەچوو.

ئەرسەلان مەحمود، لێپرسراوی راگەیاندنی مەڵبەندی 24ی راپەڕین، رایگەیاند: لەسەر بڕیار و راسپاردەی هەڤاڵ (حەیدەری ئاسایش)، لێپرسراوی مەڵبەندى 24ی راپەڕین، بەمەبەستی بەرز و زیندوو راگرتنی یادی شەهیدە نەمرەکانی یەکێتیی نیشتمانیی کوردستان و گەلەکەمان، لە ماوەی چوار رۆژی جەژنی پیرۆزی قورباندا هەڵمەتێکی گەورەی بەسەرکردنەوەی خێزان و خانەوادەی سەربەرزی شەهیدانمان ئەنجامدا.

ئاماژەى بەوەشدا: بە شانازییەوە لەم هەڵمەتەدا، زیاتر لە یەک هەزار و 210 هەڤاڵی دڵسۆز لە ئەندامانی ئەنجومەنی مەڵبەند، ئەندامانی ئەنجومەنی کۆمیتەکانی سنووری مەڵبەند و تەواوی تیمی بنکە، ناوەند و وێستگە جیاوازەکان لە سێکتەرە جیاجیاکان بەشدارییان لە سەردان و بەسەرکردنەوەکاندا کرد و لە رێگەیانەوە توانراوە زیاتر لە 5 هەزار خێزان و خانەوادەی تێکۆشەری شەهیدان لە نزیکەوە بەسەربکرێنەوە.

ئەوەشى خستەڕوو: کە ئامانج لەم بەسەرکردنەوەیە تەنها گەیاندنی پەیامی جەژنەپیرۆزە نەبووە، بەڵکوو گەیاندنی (رێزنامەی مەڵبەند) و هەواڵپرسینیان بووە لە نزیکەوە، چونکە یەکێتی حزبی شەهیدانە و رێزگرتن و خزمەتکردنی کەسوکاریان بە ئەرکێکی سەرەکی و ئەخلاقیی خۆی دەزانێت.

ئەرسەلان مەحمود لێپرسراوی راگەیاندنی مەڵبەندی راپەڕین جەختی کردەوە، ئێمە لە یەکێتیی نیشتمانیی کوردستان، قەرزارباری خۆڕاگریی کەسوکاری شەهیدانین و هەمیشە لە خزمەتی ئەو خێزان و خانەوادە سەربەرزانەدا دەبین کە رۆڵەکانیان لەپێناو پاراستنی خاک و نەتەوەکەماندا بەخشی.

PUKMEDIA