ڤاتیكان ده‌رگا به‌ ڕ‌ووی توێژه‌رانی كوردستاندا ده‌كاته‌وه‌

PUKMEDIA

بەشێک لە دیدارەکە

لێپرسراوی بۆردی ناوه‌ندی ده‌ره‌وه‌ی یه‌كێتیی نیشتمانیی كوردستان، له‌ وڵاتی ڤاتیكان سه‌ردانی دامه‌زراوه‌ی ( وه‌زاره‌ت) ی ئه‌رشیفی ڤاتیكانی كرد.

سالار مه‌حمود لێپرسراوی بۆردی ناوه‌ندی ده‌ره‌وه‌ی یه‌كێتیی نیشتمانیی كوردستان ئاماژه‌ی بۆ ئه‌وه‌ كرد: له‌دیدارێكدا له‌گه‌ڵ مۆنسنیور فلاڤیۆ بۆنومۆ به‌ڕ‌ێوه‌به‌ری ئه‌رشیفی ئاینه‌كان له‌ وڵاتی ڤاتیكان، گفتوگۆمان كرد له‌باره‌ی میكانیزی هاوكاریكردنی خوێندكارانی كوردو توێژه‌ران و رێكخراوه‌ كلتورییه‌كان بۆ لێكۆڵینه‌وه‌، سه‌باره‌ت به‌مێژووی ناوچه‌ی میزۆپۆتامیای جاران و كوردستانی ئێستا، كه‌ دیداره‌كه‌ به‌ ئاماده‌بوونی ئارام ئه‌حمه‌د براخاس و لوئه‌ی سامی گۆرگیس ئه‌نجامدرا.

ئه‌م دامه‌زراوه‌یه‌ هه‌موو نوسراوو ئه‌رشیفی به‌ر له‌پێنج سه‌ده‌ی جیهان و ناوچه‌ی میزۆپۆتامیای تێدا هه‌ڵگیراوه‌، كه‌ له‌لایه‌ن گه‌ڕ‌یده‌ ئاینی و باوه‌ڕ‌ پێكراوه‌كانی ڤاتیكانه‌وه‌ له‌سه‌رده‌مه‌ جیاجیاكاندا نوسراوه‌و ئاڵوگۆڕ‌ كراون، هه‌ر دۆكیۆمێنتێك دوای 75 ساڵ ده‌خرێنه‌ به‌رده‌ست ئه‌كادیمیست و توێژه‌ران به‌ رێكاری تایبه‌ت بۆ لێكۆڵینه‌وه‌و شه‌ن و كه‌وكردنیان.

هه‌ر له‌درێژه‌ی سه‌ردانه‌كه‌یدا لێپرسراوی ناوه‌ندی ده‌ره‌وه‌ی یه‌كێتیی نیشتمانیی كوردستان رۆژی 29-5-2026 سه‌ردانی (دامه‌زراوه‌ی دیالۆگی نێوان ئاینه‌كان)ی كرد، له‌لایه‌ن مونسنیور شربل عەتا به‌رپرسی دۆسیه‌ی رۆژهه‌ڵاتی ناوه‌ڕ‌است و ئاسیای دامه‌زراوه‌كه‌وه‌ پێشوازی لێكرا.

له‌ دیدارێكدا سالار مه‌حمود باسی له‌گرنگی برایه‌تی و په‌ره‌پێدانی سیاسه‌تی ئاشتیخوازی كردوو، رایگه‌یاند: گه‌لی كوردو یه‌كێتیی نیشتمانیی كوردستان باوه‌ڕ‌ی ته‌واوی به‌ئاشتی و پێكه‌وه‌ ژیانی راسته‌قینه‌ی نێوان پێكهاته‌كان هه‌یه‌، به‌تایبه‌تیش به‌شداری و نوێنه‌رایه‌تی راسته‌قینه‌یان له‌پرۆسه‌ی سیاسی و پارێزگاری له‌مافه‌ مه‌ده‌نی و سیاسیه‌كانیان به‌پێی ده‌ستورو یاسا به‌ركاره‌كان.

مونسنیور شربل به‌رپرسی رۆژهه‌ڵاتی و ناوه‌ڕ‌است و ئاسیای دامه‌زراوه‌كه‌ باسی له‌میهره‌بانی خه‌ڵكی كوردستان كرد، به‌تایبه‌تی له‌دۆخه‌ دژواره‌كاندا باوه‌شیان بۆ مه‌سیحیه‌كان و پێكهاته‌كانی تری ناوچه‌كانی عیراق كردوه‌ته‌وه‌.

هاوکات سالار مه‌حمود راشیگه‌یاند: كوردستان شوێنێكی گرنگی ژیان و مرۆڤدۆستیه‌و له‌رابردوودا خه‌ڵكه‌كه‌ی زۆر ئازاردراون و ئه‌و راستییه‌ی بیرهێنایه‌وه‌ كه‌ له‌شاڵاوه‌كانی ئه‌نفالدا هه‌موو پێكهاته‌كانی كوردستان رووبه‌ڕ‌ووی كۆمه‌ڵكوژی بونه‌ته‌وه‌، له‌قۆناغی هه‌شته‌می شاڵاوه‌كانی ئه‌نفالدا چه‌ندین گوندی خوشك و برایانی كریستیان رووبه‌ڕ‌ووی ئه‌و تاوانه‌ نێوه‌ده‌وڵه‌تیه‌ بوونه‌وه‌و هه‌م خۆیان بوون به‌قوربانی و هه‌م گونده‌كانیان روخێنران.

هه‌ر هه‌مان رۆژ سالار مه‌حمود چاوی كه‌وت به‌ عه‌مار محه‌مه‌د سه‌فیری عیراق له‌ڤاتیكان و له‌دیدارێكدا باسی پرسی كارئاسانی بۆ خوێندكاران و توێژه‌ران و رێكخراوه‌ كلتوریه‌كان كرا، سه‌باره‌ت به‌چالاكی كلتوریی و توێژینه‌وه‌.

PUKMEDIA